سیلف ہیلپ گروپ خواتین کو بااِختیار بنانے میں اہم کردار اَدا کر رہے ہیں: لیفٹنٹ گورنر

امت نیوز ڈیسک //
لیفٹیننٹ گورنر منوج سِنہا نے آج سری نگر کی مشہورجھیل ڈل میں سارس آجیو یکا میلے میں شرکت کی ۔
اُنہوں نے کہا کہ سارس آجیویکا میلہ دیہی سیلف ہیلپ گروپوں اور کاریگروں کو اَپنی مصنوعات کا مظاہرہ کرنے ، خریداروں کے ساتھ تعلقات اُستوار کرنے اور ڈیزائن ، پیکیجنگ او رسوشل میڈیا اِشتہارات کے بارے میں جاننے کے لئے ایک بہترین پلیٹ فارم فراہم کر رہا ہے۔
لیفٹیننٹ گورنر نے کہا،” سیلف ہیلپ گروپ خواتین کو بااِختیار بنانے میں اہم کردار اَدا کر رہے ہیں۔حکومت نے خواتین کارباریوں کو اَپنے کاروبار کو بڑھانے اورگلوبل مارکیٹ سے منسلک ہونے کے مواقع فراہم کرنے میں مدد کرنے کے لئے متعدد اقدامات کئے ہیں۔“
اُنہوں نے مزید کہا کہ جموںوکشمیرمیں زائد اَز 78,000 ایس ایچ جیز سے وابستہ تقریباً 6.27 لاکھ خواتین نے دیہی معیشت کو بد ل دیا ہے ، روزگار پیدا کی ہیں اور چند ایک نے بڑے کاروباری اِدارے بننے کی صلاحیت بھی ظاہر کی ہے۔
لیفٹیننٹ گورنرمنوج سِنہا نے خواتین کاروباریوں اور سیلف ہیلپ گروپوں کے اَرکان سے جموںوکشمیر میں ہونے والی سماجی و اِقتصادی تبدیلی کی قیادت کرنے پر زور دیا۔
اُنہوں نے مزید کہا کہ وزیر اعظم کی رہنمائی میں گذشتہ تین برسوں میں ہماری کوششوں نے خواتین کو ہر شعبے میں مساوی مواقع فراہم کئے ہیں اور اُنہیں ترقی یافتہ اور اتما نربھر جموںوکشمیر کے ہدف کو حاصل کرنے میں مساوی شراکت دار بننے کے قابل بنایا ہے۔
لیفٹیننٹ گورنر نے دیہی ترقی اور پنچایتی راج محکمہ اور جے اینڈ کے رور ل لائیو لی ہڈز مشن کو دیہی خواتین کی روزی روٹی کو محفوظ بنانے اور ان کے کاروباری سفر کی خاطر مناسب تربیت اور دیگر مدد فراہم کرنے کے لئے ان کی کوششوں پر مُبارک باد دی۔
اُنہوں نے حکومت کے فلیگ شپ پروگراموں اور سکیموں پر روشنی ڈالی جو جموںوکشمیر میں خواتین کے لئے ثمر آور ثابت ہو رہی ہے۔
لیفٹیننٹ گورنر نے کہا کہ ہمارا مقصد خواتین کی قیادت میں ترقی ہے ۔ اِس بات کو یقینی بنایا جارہاہے کہ شہری ، دیہی اور دُور دراز علاقوں میں خواتین کاروباریوں کو پیکیجنگ ، برانڈنگ ، لائسنسنگ ، سکلنگ اور مارکیٹنگ میں تمام مالی اِمداد اور ضروری ہینڈ ہولڈنگ ملے ۔
اِس موقعہ پر لیفٹیننٹ گورنر نے رورل لائیولی ہڈز مشن کی اِشاعت جاری کی۔
اِس سے قبل لیفٹیننٹ گورنر نے جموںوکشمیر اور ملک بھر سے منفرد مصنوعات ، روایتی ضیافتوں کی نمائش کرنے والے مختلف سٹالوں کا معائینہ کیا اور کاریگروں ، خواتین کاروباریوں اور سیلف ہیلپ گروپوں کے ارکان سے بھی اِستفساری گفتگو کی۔