*عیدگاہ سری نگر میں نماز عید: سیکیورٹی ایجنسیوں نے ابھی تک حتمی کال نہیں لی*
سری نگر، 5 اپریل: گرمائی دارالحکومت سری نگر میں پولیس اور سول انتظامیہ نے تاریخی عید گاہ سری نگر میں نماز عید کی اجازت دینے کے بارے میں ابھی تک کوئی حتمی فیصلہ نہیں کیا ہے۔
معتبر ذرائع نے بتایا کہ سیکورٹی ایجنسیوں نے حتمی فیصلہ نہیں کیا ہے اور ابھی یہ فیصلہ نہیں کیا گیا ہے کہ عید گاہ سری نگر میں نماز عید ادا کی جائے گی یا نہیں۔
واضح رہے کہ چیئرپرسن وقف بورڈ ڈاکٹر درخشن اندرابی نے حال ہی میں ایک سوال کے جواب میں کہا تھا کہ سری نگر میں سازگار ماحول کو دیکھتے ہوئے عید کی نماز عیدگاہ سری نگر میں ادا کی جائے گی۔
ذرائع نے بتایا کہ اس سلسلے میں سول اور پولیس انتظامیہ کے اعلیٰ حکام ایک میٹنگ کریں گے جس میں وقف کے عہدیداروں کو بھی مدعو کیا جا سکتا ہے۔ ذرائع نے مزید بتایا کہ اسی اجلاس میں حتمی فیصلہ کیا جائے گا۔
