وسطی کشمیر کے گاندربل ضلع میں اسکول جانے والے دو لڑکوں پر اسکول کے باہر چاقو سے حملہ کیاگیا۔ ایک اہلکار نے مقامی خبر رساں ایجنسی کو بتایا کہ پیر کی دوپہر نامعلوم افراد نے گاندربل کے بہامہ علاقے میں دو نوجوانوں پر چاقو سے وار کیا جس کے نتیجے میں دونوں شدید زخمی ہو گئے۔ 14 اور 16 سال کی عمر کے دونوں کو گاندربل کے ضلع اسپتال لے جایا گیا جہاں سے انھیں علاج کے لیے سری نگر ریفر کر دیا گیا ہے۔ اہلکار نے بتایا کہ دونوں کی شناخت ہدایت احمد تانترے اور ابراہیم تانترے کے طور پر کی گئی ہے، دونوں بہامہ کے رہائشی ہیں، جب اسکول سے نکل رہے تھے کہ کچھ نامعلوم افراد نے ان پر تیز دھار چیز سے حملہ کیا۔
پولیس کا کہنا ہے کہ اس نے حملہ آوروں کی شناخت کر لی ہے اور ملزمان کی گرفتاری کے لیے تلاش شروع کر دی گئی ہے۔ دریں اثنا دونوں کی حالت مستحکم بتائی جا رہی ہے۔
