سری نگر، 31 مئی، : قومی تحقیقاتی ایجنسی نے بدھ کو کریک ڈاؤن جاری رکھتے ہوئے وسطی کشمیر کے بڈگام ضلع میں کم از کم تین مقامات پر قومی جانچ ایجنسی کے ذریعہ درج کئے گئے ایک معاملے میں چھاپے مارے۔
سرکاری ذرائع نے سری نگر کی خبر رساں ایجنسی کشمیر ڈاٹ کام کو بتایا کہ این آئی اے کے اہلکاروں نے جموں و کشمیر پولیس اور سی آر پی ایف کی مدد سے ضلع بڈگام میں تین مقامات پر چھاپے مارے۔
این آئی اے کے اہلکاروں نے فاروق احمد بھٹ ولد غلام حسن بھٹ کے گھر اور زبیر احمد ڈار ولد مرحوم عبدالحمید ڈار کے گھر کی تلاشی لی جو دونوں اریپٹن کے رہنے والے تھے۔
دوسری ٹیم نے ضلع کے اسی گاؤں میں علی محمد ڈار ولد غلام احمد کے رہائشی مکان پر چھاپہ مارا۔
ایک اہلکار نے تصدیق کی اور کہا کہ این آئی اے کے دفتر میں پہلے سے درج ایک کیس کے سلسلے میں چھاپے مارے جا رہے ہیں۔ انہوں نے کہا کہ کیس کی تفصیلات بعد میں شیئر کی جائیں گی۔
