امت نیوز ڈیسک //
جموں (جموں و کشمیر) :سرکاری ذرائع کے مطابق ہفتے کی صبح بھگوتی نگر بیس کیمپ سے 7 ہزار 3 سو 92 یاتریوں پر مشتمل امرناتھ یاتریوں کا 13 واں جتھا کشمیر کے لیے روانہ ہوا۔ ذرائع نے بتایا کہ امرناتھ یاتریوں کا یہ جتھا 276 چھوٹی بڑی گاڑیوں میں سخت سکیورٹی بندوبست کے بیچ وسطی کشمیر کے بالتل اور جنوبی کشمیر کے نُنون، پہلگام بیس کیمپوں کے لیے روانہ ہوا۔
حکومتی ذرائع کا کہنا تھا کہ ان یاتریوں میں 4 ہزار 8 سو 97 مرد، 2 ہزار 95 خواتین، 55 بچے، 3 سو 19 سادھو اور 26 سادھویں شامل تھیں۔ ذرائع نے بتایا کہ ان یاتریوں میں سے بالتل بیس کیمپ کے لیے 3 ہزار 3 سو 68 یاتری روانہ ہوئے جب کہ ننون پہلگام بیس کیمپ کے لیے 4 ہزار 24 یاتری روانہ ہوگئے۔ یاد رہے کہ یکم جولائی سے شروع ہونے والی اس یاترا کے دوران اب تک، سرکاری اعداد و شمار کے مطابق، زائد از ڈیڑھ لاکھ یاتریوں نے پوتر گپھا کا درشن کیا ہے۔ 62 دنوں پر محیط سالانہ یاترا 31 اگست کو شرون پورنیما کے موقع پر اختتام پذیر ہوگی۔
جموں و کشمیر انتظامیہ نے امرناتھ یاتریوں کی سہولیت کے لئے دونوں راستوں – بال تل اور ننہ وَن، پہلگام – پر ہیلی کاپٹر سروس بھی دستیاب رکھی ہے۔ یاتریوں کی سہولت کے لیے جگہ جگہ لنگر بھی قائم کیے گئے ہیں اور انتظامیہ نے یاتریوں کی صحت کے پیش نظر جنک فوڈ سمیت چکنائی والے کھانے پر مکمل پابندی عائد ہے۔ یاتریوں نے حکومت سمیت سیکورٹی ایجنسیز کی جانب سے کیے گئے انتظامات پر اطمینان کا اظہار کیا ہے۔
