امت نیوز ڈیسک //
چنڈی گڑھ: ہریانہ کے نوح میں تشدد کے بعد ہائی کورٹ نے ریاستی حکومت کی بلڈوزر کارروائی پر روک لگا دی ہے۔ ہائی کورٹ کا حکم آتے ہی ڈپٹی کمشنر دھیریندر کھرگٹا نے فوری طور پر افسران کو کارروائی کرنے سے روک دیا۔ حکومت کی مسماری مہم پر ہائی کورٹ نے ازخود نوٹس لے لیا۔ پنجاب اور ہریانہ ہائی کورٹ کے جسٹس گرمیت سنگھ سندھاوالیا نے حکم امتناعی دیا۔ نوح میں گزشتہ 4 روز سے مسماری کا سلسلہ جاری تھا۔
سب ڈویژنل مجسٹریٹ اشونی کمار نے کہا کہ جو ڈھانچے منہدم کیے گئے تھے وہ غیر قانونی طور پر تعمیر کیے گئے تھے اور حالیہ تشدد کے دوران پتھراؤ کے لیے ’’گنڈے‘‘ استعمال کرتے تھے۔ قبل ازیں، ضلعی انتظامیہ نے ہفتے کے روز 12 مختلف مقامات پر غیر قانونی تعمیرات کو بلڈوز کر دیا، جس میں نہر میڈیکل کالج کے ارد گرد 2.6 ایکڑ اراضی بھی شامل ہے۔
اس دوران 753 سے زائد مکانات، دکانیں، شوروم، کچی آبادیوں اور ہوٹلوں کو مسمار کیا گیا ہے۔ انہیں غیر قانونی قرار دیتے ہوئے انتظامیہ نے کہا کہ ان میں رہنے والے لوگ 31 جولائی کے تشدد میں ملوث تھے۔ نوح میں اب تک انتظامیہ نے 37 مقامات پر کارروائی کرکے 57.5 ایکڑ اراضی واگزار کروائی ہے۔ ان میں سے 162 مستقل اور 591 عارضی ڈھانچے گرائے گئے۔
نوح ٹاؤن کے علاوہ پنہانہ، نگینہ، فیروز پور جھرک اور پنگنوا جیسے علاقوں میں بھی تجاوزات ہٹا دی گئیں۔ گزشتہ روز انتظامیہ نے 3 منزلہ سہارا ہوٹل کو بھی منہدم کر دیا تھا جہاں سے تشدد کے دن پتھراؤ کیا گیا تھا۔ انتظامیہ کا کہنا ہے کہ ہوٹل مالک کو سب کچھ معلوم تھا لیکن اس نے فسادیوں کو پتھر جمع کرنے سے نہیں روکا۔
نوح میں کرفیو میں نرمی بڑھ گئی
نوح میں تشدد کے بعد کرفیو میں نرمی بڑھنے لگی ہے۔ پیر کو انتظامیہ نے سرکاری دفاتر، بینک-اے ٹی ایم کھولنے کی اجازت دے دی ہے۔ تاہم، بینک اور اے ٹی ایم صرف 11 بجے سے دوپہر 3 بجے تک کھلیں گے۔ کرفیو میں نرمی کا وقت اب صبح 9 بجے سے دوپہر 1 بجے تک کر دیا گیا ہے۔ انتظامیہ کا کہنا ہے کہ لوگ شناختی کارڈ دکھا کر سرکاری دفتر یا بینک-اے ٹی ایم جا سکتے ہیں۔ نوح میں 8 اگست کی رات 12 بجے تک انٹرنیٹ بند رہے گا۔ پلوال میں آج یعنی 7 اگست کی رات 12 بجے تک انٹرنیٹ بند ہے۔ فرید آباد کے بلبھ گڑھ میں کشیدہ صورتحال کے پیش نظر اتوار کی رات دیر گئے انٹرنیٹ معطل کر دیا گیا۔ جو آج رات 12 بجے تک بند رہے گا۔نوح سے متصل پلوال ضلع میں ایک ہفتے سے بند اسکول اور دیگر تعلیمی ادارے کھل گئے ہیں۔ تاہم، بہت کم بچے سرکاری اسکولوں تک پہنچے ہیں۔
سیکورٹی کے سخت انتظامات
کانگریس ایم ایل اے سے اضافی سیکورٹی واپس لے لی گئی، 2 بندوق بردار رہیں گے حکومت نے نوح کی فیروز پور جھرکہ سیٹ سے کانگریس ایم ایل اے ممن خان سے اضافی سیکورٹی واپس لے لی ہے۔ حالانکہ ان کے پاس ایم ایل اے پروٹوکول کے طور پر 2 سیکورٹی اہلکار تعینات ہوں گے۔ سیکیورٹی ہٹانے کے حوالے سے ممان خان کا کہنا تھا کہ انہیں دھمکیاں مل رہی ہیں۔ انہوں نے یہ بھی کہا کہ نوح کے دیگر کانگریس ایم ایل اے نے بھی مونو مانیسر کے بارے میں بیانات دیئے تھے لیکن سیکورٹی صرف ان کے لئے کٹوائی گئی تھی۔
