امت نیوز ڈیسک //
سرینگر:جموں وکشمیر پولیس نے سرینگر میں مغربی بنگال کے شہری کو ایک پستول سمیت گرفتار کیا ہے۔ جو اس نے ایک وی آئی پی کے گھر سے چوری کیا تھا۔ پولیس کا کہنا ہے کہ مغربی بنگال کے علپردور علاقے کے رہنے والے لوکیش کمار کو ریگل چوک سے گرفتار کیا ہے۔ پولیس کا کہنا ہے کہ لوکیش کمار نے یہ پستول ایک لائسنس ہولڈر کے گھر سے رات گئے چوری کیا تھا۔ تاہم پولیس نے ان کو رات کے دوران ہی ریگل چوک سے گرفتار کر لیا تھا۔ پولیس ذرائع کے مطابق مذکورہ ملزم نے یہ پستول سرینگر کے گپکار علاقے سے ایک وی آئی پی کے گھر سے چوری کیا تھا جہاں یہ گھریلو کام کر رہا تھا۔
پولیس ذرائع نے بتایا کہ ملزم لوکیش کمار نے دوران شب مذکورہ وی آئی پی کے گھر سے یہ پستول چوری کیا تھا تاہم پولیس کو دوران شب ہی اس کی اطلاع ملی تھی۔ پولیس کا کہنا ہے کہ انہوں نے شہر میں ناکہ بندی کی اور ریگل چوک کے پاس لوکیش کمار کو پستول سمیت گرفتار کیا ہے۔ لوکیش کمار کے خلاف پولیس نے سرینگر کے کوٹھی باغ تھانے میں 31/2023 ایف آئی آر درج کیا ہے۔ پولیس نے اس ضمن میں مزید تفصیلات نہیں بتائی، تاہم یہ کہا کہ اس میں مزید تحقیقات کی جارہی ہیں۔
