امت نیوز ڈیسک //
کپواڑہ:بارڈر سکیورٹی فورس (بی ایس ایف) کے انسپکٹر جنرل کشمیر اشوک یادو نے سرحدی ضلع کپواڑہ کے اگلے علاقوں کا دورہ کرکے سکیورٹی صورتحال کا جائزہ لیا۔
بی ایس ایف کشمیر نے اپنے ٹویٹر ہینڈل پر جمعرات کو جانکاری فراہم کرتے ہوئے کہا کہ بی ایس ایف کے آئی جی کشمیر اشوک یادر نے کپواڑہ میں اگلے علاقوں کا دورہ کیا اور وہاں تعینات بی ایس ایف یونٹ کی آپریشنل تیاریوں کا جائزہ لیا۔
انہوں نے ٹویٹ میں کہا کہ موصوف آئی جی نے اس دوران وہاں تعینات فوجی جوانوں کے ساتھ بات چیت بھی کی اور لائن آف کنٹرول کے تحفظ کے لئے ان کے عزم اور حوصلے کی سراہنا کی۔
قابل ذکر ہے کہ جموں وکشمیر کے سرحدوں پر قائم پُر امن ماحول سے جہاں سرحدی علاقوں کے لوگوں کی خوشی کا کوئی ٹھکانہ نہیں ہے وہیں دوسری طرف سرحدی سیاحت کو بھی فروغ دیا جا رہا ہے جو ان علاقوں کے نوجوانوں کے لئے روزگار کا ایک موثر ذریعہ ثابت ہو رہا ہے۔
واضح رہے کہ پچھلے ماہ فوج کے سربراہ جنرل منوج پانڈے نے لداخ میں حقیقی کنٹرول لائن کا دورہ کر کے موجودہ زمینی صورتحال کا جائزہ لیا تھا۔ اس سے قبل فوجی سربراہ نے سیاچن گلیشئر کا دورہ کیا اور وہاں پر آپریشنل تیاریوں کا جائزہ لینے کے علاوہ دنیا کے بلند ترین مقام پر اپنی جانوں کا نذرانہ پیش کرنے والے فوجیوں کو خراج عقیدت پیش کیا۔
