امت نیوز ڈیسک //
اننت ناگ: جموں و کشمیر پولیس کی ریاستی تحقیقاتی ایجنسی (ایس آئی اے) ونگ نے اننت ناگ کے جنگلات منڈی اور کھنہ بل علاقے میں آج صبح عسکریت پسندوں کی فنڈنگ معاملے میں چھاپے مارے۔
ذرائع کے مطابق ریاستی تحقیقاتی ایجنسی کشمیر کی ایک ٹیم نے پولیس اور سی آر پی ایف کے ساتھ مشترکہ طور پر کشمیر کے مختلف علاقوں میں عسکریت پسندوں کو فنڈنگ فراہم کرنے کے معاملات میں چھاپہ مار کارروائی انجام دی۔ جس کے دوران کئی رہائشی مکانوں کی تلاشی لی گئی۔ ریاستی تحقیقاتی ایجنسی اس وقت اننت ناگ، کولگام سمیت کشمیر کے دیگر اضلاع میں متعدد مقامات پر چھاپے مار رہی ہے۔
تفصیلات کے مطابق اننت ناگ کے جنگلات منڈی اور کھنہ بل علاقے پر تلاشی لی جا رہی ہے۔وہیں ذرائع نے ای ٹی وی بھارت کو بتایا کہ شکیل احمد شاعر ساکنہ جنگلات منڈی اور ماجد علی لاوے ساکنہ کھنہ بل کے گھر پر آج صبح ہی چھاپہ مار کارروائی شروع کی گئی۔
واضح رہے کہ ریاستی تحقیقاتی ایجنسی اور قومی تحقیقاتی ایجنسی کی جانب سے ٹیرر فنڈنگ معاملے میں اس سے پہلے بھی وادی کشمیر کے مختلف علاقوں میں چھاپے مارے گئے اور اس ضمن میں املاک کو بھی ضبط کیا گیا۔ جبکہ اس ضمن میں ایس آئی اے اور این آئی اے کی جانب سے گرفتاریاں بھی عمل میں آئی تھیں۔”
