امت نیوز ڈیسک //
سری نگر: جموں وکشمیر کی سب سے بڑی ادبی تنظیم ادبی مرکز کمراز نے کشمیری زبان کو ترجمہ سروس میں شامل کرنے پر مائیکرو سافٹ انڈیا کا شکریہ ادا کیا ہے۔تنظیم کے ایک ترجمان نے کہا کہ ہم کشمیری زبان کو ترجمہ سروس میں شامل کرنے پر مائیکرو سافٹ انڈیا کا تہہ دل سے شکریہ ادا کرتے ہیں۔انہوں نے کہا کہ کشمیری زبان، جس سے 7 ملین لوگوں کو فائدہ ہوگا، کو ترجمہ سروس میں شامل کرنا ہمارے لئے ایک یاد گار لمحہ ہے۔ان کا کہنا تھا: ‘ہم مائیکرو سافٹ کے ساتھ زبان کی مزید ترقی کے لئے بھر پور تعاون فراہم کرنے کے لئے تیار ہیں’۔موصوف ترجمان نے کہا کہ ہم گوگل ترجمہ سروس میں کشمیری زبان کو شامل کرنے کے لئے گوگل کے ساتھ بھی مسلسل رابطے میں ہیں اور اس ضمن میں مثبت نتائج متوقع ہیں۔
انہوں نے کہا: ‘تاہم مائیکرو سافٹ ترجمہ سروس میں کشمیری زبان کا شامل ہونا ایک بہت بڑی کامیابی ہے جس کا ہم سب مادری زبان کے ساتھ محبت کرنے والے انفرادی سطح پر بھی اور اجتماعی سطح پر بھی سال 2023 کے اختتام پر ایک تحفے کے بطور جشن منا رہے ہیں’۔
ان کا کہنا تھا: ‘ہم پُر امید ہیں کہ گوگل ترجمہ سروس میں کشمیری زبان کے شامل ہونے کے سلسلے میں ہماری کاوشیں ثمر آور ثابت ہونے کے ساتھ ہی ایک اور جشن منایا جائے گا’۔انہوں نے امید ظاہر کی کہ اگلے سال کے دوران کشمیری زبان کو گوگل ترجمہ سروس میں شامل کیا جائے گا۔
بتادیں کہ جموں وکشمیر ادبی مرکز کمراز نے سال رواں کے ماہ نومبر میں گوگل کو کشمیری زبان کے تصدیق شدہ رسم الخط نستعلیق کو اپنی ترجمہ سروس میں شامل کرنے کے لئے ایک آن لائن عرضی پیش کی ہے۔(یو این آئی)
