امت نیوز ڈیسک //
سرینگر (جموں کشمیر) : ڈل جھیل کی کنارے اور زبرون پہاڑی سلسلہ کے دامن میں واقع سری نگر کا ’’اندرا گاندھی میموریل ٹیولپ گارڈن‘‘ آنے والے سیزن میں گل لالہ کے رنگین پھولوں کی شاندار نمائش کے لیے تیار ہے۔ حکام نے اعلان کیا ہے کہ ایشیاء کا یہ سب سے بڑا ٹیولپ گارڈن پہلی بار پانچ نئی اقسام سمیت 17 لاکھ ٹیولپ کے پھولوں کی نمائش کرے گا۔
باغ گل لالہ کو مزید جاذب نظر بنانے اور یہاں آنے والے سیاحوں کی دلجوئی کے لیے گل سالہ کی مجموعی ویرائٹی کو 73 اقسام تک پہنچا دیا گیا ہے، جو گزشتہ برس کے مقابلے میں پیش کی گئی 68 اقسام سے زیادہ ہیں۔ باغ گلہ لالہ کی خوبصورتی کے لئے کام کرنے والے ہنر مند شخص اور باغ گل لالہ کے انچارج جاوید مسعود نے بتایا کہ ’’ہالینڈ سے گلابیوں کی ترسیل میں تاخیر کی وجہ سے کام کا دورانیہ دسمبر کے وسط تک بڑھ گیا تھا، تاہم اس کے باوجود آنے والے سیزن کی تیاریاں مکمل کر لی گئی ہیں۔‘‘مسعود نے یقین دہانی کرائی کہ ’’تاخیر کے باوجود ٹیولپ گارڈن، جو حال ہی میں ورلڈ بک آف ریکارڈز میں شامل کیا گیا ہے، میں 17 لاکھ ٹیولپ کے ساتھ پورے آب و تاب سے سیاحوں کے لیے کھلے گا، جو مہمانوں کے لیے ایک دلکش منظر ثابت ہوگا۔‘‘ مسعود نے اس بات پر روشنی ڈالی کہ باغ کی خوبصورتی بڑھانے میں عملے اور باغبانوں سمیت تقریباً ایک سو افراد کی محنت اور کاوشیں شامل ہیں۔
سنہ 2007 میں قائم کیے گئے ٹیولپ گارڈن کا مقصد وادی کشمیر میں سیاحت اور پھولوں کی زراعت کو فروغ دینا ہے۔ 30 ہیکٹر رقبے پر سات ٹیلیوں میں پھیلا ہوا اس کا منفرد ٹیراس ڈیزائن اس قدرتی عجوبے کے حسن میں اضافہ کرتا ہے۔ ٹیولپ گارڈن کا افتتاح کشمیر میں نئے سیزن، سرما کے اختتام اور بہار کی آمد کا آغاز ظاہر کرتا ہے۔
مسعود نے خوشی کا اظہار کرتے ہوئے کہا: ’’سری نگر میں ٹیولپ گارڈن کے قیام سے پہلے، موسم بہار کے دوران جموں کشیمر آنے والے سیاحوں کی تعداد زیادہ نہیں تھی۔ تاہم، جیسے جیسے وقت گزرتا گیا، سیاحوں کی تعداد میں ہر سال اضافہ ہوتا رہا ہے اور اس سال بھی سیاحوں کی زیادہ تعداد کی توقع ہے۔
