امت نیوز ڈیسک //
سرینگر: جموں و کشمیر کے لیفٹیننٹ گورنر منوج سنہا نے سال نو کی آمد پر لوگوں کو مبارک باد پیش کی ہے۔ انہوں نے کہا: ‘میں دعا گو ہوں کہ یہ سال تمام لوگوں کے لے خوشی و خوشحالی لے کر آئے’۔
موصوف لیفٹیننٹ گورنر نے سماجی رابطہ گاہ ‘ایکس’ پر ایک پوسٹ میں کہا: ‘میں سال نو کی آمد پر تمام لوگوں کو مبارک باد اور ان کے لئے نیک خواہشات کا اظہار کرتا ہوں’۔انہوں دعا کرتے ہوئے کہا: ‘سال 2024 تمام لوگوں کے لئے خوشحالی، اچھی صحت اور خوشی لے کر آئے’۔
دنیا بھر کی طرح سرینگر کے تاریخی لال چوک میں اتوار کی شام لوگوں کے ایک جم غفیر نے سال نو کے آمد کے پیش نظر جشن منایا۔جشن کے پیش نظر لالچوک اور گردنواح میں سیکورٹی کے غیر معمولی انتظامات کئے گئے تھے۔جموں وکشمیر کی تاریخ میں ایسا پہلی مرتبہ ہوا ہے جب گرمائی دارالحکومت سرینگر کے گھنٹہ گھر کے نزدیک نئے سال کا جشن منایا گیا، جس میں ہزاروں لوگوں نے شرکت کی۔
وہیں ونٹر ٹورزم کو فروغ دینے کے لیے سال گزشتہ کی آخری شب یعنی 31 دسمبر 2023 کو گلمرگ کے علاوہ معروف سیاحتی مقامات سونہ مرگ اور پہلگام میں بھی نئے سال کے استقبال کے لیے تقریب کا انعقاد کیا گیا۔ جموں و کشمیر محکمہ سیاحت کی جانب سے پہلے ہی اس ضمن میں پروگرام تریب دیا گیا تھا اور لوگوں کی دل جوئی کے لیے مقامی گلوکاروں کو بھی مدعو کیا گیا تھا۔
