امت نیوز ڈیسک //
سرینگر:مرکزی وزیر داخلہ امیت شاہ جموں و کشمیر کی سیکورٹی صورتحال کا جائزہ لینے کے لیے راجدھانی دہلی میں ایک اہم اور اعلیٰ سطح کی میٹنگ کی صدارت کریں گے۔ منگل کو بعد دوپہر منعقد ہونے والی اس میٹنگ میں، ذرائع کے مطابق، قانون و نظم کی صورتحال، سیکورٹ گرڈ کی فعالیت اور عسکری پسندی کے مکمل خاتمے کی عملی کارروائی پر تبادلہ خیال کیا جائے گا۔
میٹنگ میں شرکت کرنے والی اہم شخصیات میں جموں و کشمیر کے لیفٹیننٹ گورنر منوج سنہا، چیف سیکریٹری اتل ڈلو اور ڈائریکٹر جنرل آف پولیس آر آر سوین شامل ہیں۔ اس کے علاوہ نیشنل سیکورٹی ایڈوائزر اجیت ڈوبھال، یونین ہوم سیکریٹری اجے بھلہ، ڈائریکٹر انٹیلیجنس بیورو ٹاپن ڈیکا اور سینٹرل ریزرو پولیس فورس اور بارڈر سیکیورٹی فورس کے ڈائریکٹر جنرلز بھی موجود ہوں گے۔
میٹنگ میں وزیر داخلہ جموں و کشمیر میں عسکریت پسندی کے خاتمے کی عملی کارروائی، قانون و نظم کی صورتحال اور غیر قانونی سرگرمیاں (روک تھام) ایکٹ (یو اے پی اے) کے تحت مقدمات کا بھی جائزہ لیں گے۔
یاد رہے کہ وزیر داخلہ نے گزشتہ برس بھی جنوری کی 13تاریخ کو جموں و کشمیر میں سیکورٹی صورتحال پر ایک اہم ریویو میٹنگ کی صدارت کی تھی۔ اس میٹنگ میں انہوں نے حکومت کی عسکریت پسندی کے خلاف ’’زیرو ٹالرنس پالیسی‘‘ کو دوبارہ ایک نئی جہت دینے کا وعدہ کیا تھا۔ اس میٹنگ کو دیکھتے ہوئے اندازہ لگایا جا سکتا ہے کہ وزیر داخلہ جموں و کشمیر میں سیکورٹی صورتحال کو مزید بہتر بنانے کے لیے سخت اقدامات اٹھانے کے خواہاں ہے۔
