امت نیوز ڈیسک //
سرینگر (جموں و کشمیر): دہلی پولیس نے منگل کے روز جموں و کشمیر پولیس کے ذریعہ حال ہی میں کرناہ علاقہ میں کراس باڈر ملی ٹینٹ ماڈیول کا پردہ فاش کرنے والے ایک اہم سازشی کو گرفتار کرنے کا دعوی کیا ہے۔ جبکہ گرفتار شدہ شخص گزشتہ سال آرمی سے سبکدوش ہوا ہے
پولیس ترجمان کی طرف سے جاری کردہ بیان کے مطابق، ملزم کی گرفتاری نئی دہلی ریلوے اسٹیشن کے عملے نے کی ہے۔ملزم کی شناخت ریاض احمد کے بطور ہوئی ہے۔ترجمان نے انکشاف کیا کہ احمد کو 4 فروری کو نئی دہلی ریلوے اسٹیشن سے فرار ہونے کی کوشش کے دوران حراست میں لیا گیا تھا۔
ترجمان کے مطابق ریاض احمد مبینہ طور پر خورشید احمد راتھر اور غلام سرور راتھر کے ساتھ سازش کرنے میں ملوث تھا، جس کا مقصد عسکریت پسندوں کے ہینڈلرز کے ذریعے لائن آف کنٹرول (ایل او سی) کے پار سے اسلحہ اور گولہ بارود حاصل کرنا تھا۔
انہوں نے بتایا کہ جموں و کشمیر کی تحقیقاتی ایجنسیوں کو چار فروری کو مخصوص معلومات موصول ہوئی تھیں، جن میں کرناہ سے تعلق رکھنے والے ریاض احمد راتھر کو حال ہی میں پکڑے گئے ماڈیول کے سلسلے میں مطلوب فرد کے طور پر شناخت کیا گیا تھا۔ اس ماڈیول میں پانچ افراد کو گرفتار کیا گیا ہے اور ان سے مجرمانہ مواد بھی برآمد کیا گیا تھا۔
ریاض احمد راتھر پر شبہ ہے کہ انہوں نے خورشید احمد راتھر اور غلام سرور راتھر سے اسلحہ اور گولہ بارود کی کھیپ حاصل کی تھی، جن دونوں کو پہلے جموں و کشمیر پولیس نے گرفتار کیا تھا۔ ترجمان نے بیان میں کہا کہ ریاض احمد اور الطاف دونوں 31 جنوری 2023 کو بھارتی فوج سے ریٹائر ہوئے تھے۔
پولیس نے احمد کے قبضے سے ایک موبائل فون اور ایک سم کارڈ برآمد کر لیا، اور مزید ضروری کارروائی کے لیے جموں و کشمیر پولیس حکام کو باضابطہ طور پر مطلع کیا گیا ہے۔ اس معاملے کی تحقیقات سازش کے مکمل پردہ فاش کرنے کے لیے جاری ہیں۔
