امت نیوز ڈیسک //
اننت ناگ: جموں و کشمیر کے ضلع اننت ناگ کے کوکرناگ علاقہ میں پولیس کی بروقت کارروائی میں دو نقب زنوں کو گرفتار کیا گیا۔ گرفتار ملزمین کے قبضہ سے مالہ مسروقہ برآمد کیا گیا ہے۔ دراصل پولیس اسٹیشن کوکرناگ کو ساگم کوکرناگ سے تعلق رکھنے والی روبی اختر زوجہ محمد اقبال وازہ نام کی ایک خاتون کی طرف سے تحریری شکایت موصول ہوئی۔ خاتون نے اپنی شکایت میں بتایا کہ وہ اپنی بہن کے گھر تھوڑی دیر کے لیے آئی تھی۔ اُسی دوران کچھ نامعلوم چور اس کے گھر کے اندر داخل ہوئے۔ نقب زنوں نے کچھ نقدی، طلائی زیورات، تانبے کے برتن وغیرہ چوری کر لیے۔
اس مناسبت سے پولیس اسٹیشن کوکرناگ میں مقدمہ درج کر کے تفتیش شروع کی گئی۔ تحقیق کے بعد کوکرناگ پولیس پارٹی نے اس سلسلے میں کارروائی کرتے ہوئے فیضان گلزار لون ولد گلزار احمد لون ساکن ماگرے پورہ اچھہ بل اور بلال احمد گنائی ولد غلام احمد گنائی ناگم کوکرناگ کو گرفتار کر لیا۔ پولیس نے گرفتار شدگان کے قبضے سے مسروقہ مال برآمد کر لیا۔ اس معاملے میں پولیس کی جانب سے مزید تفتیش کی جارہی ہے۔
