امت نیوز ڈیسک //
سری نگر: درگاہ حضرت بل زیارت میں مبینہ جبری مذہب تبدیلی کے معاملے کے خلاف ایف آئی آر درج ہونے کے چند روز بعد جموں و کشمیر وقف بورڈ نے زیارت کے امام و خطیب کو تحقیقات مکمل ہونے تک فارغ کرکے اس سلسلے میں ایک تحقیقاتی کمیٹی تشکیل دی ہے۔
تادیں کہ ماہ رمضان کے جمعۃ الوداع کے موقع پر ایک ویڈیو وائرل ہوا تھا جس میں حضرت بل زیارت میں ایک غیر مقامی شخص کو نماز جمعہ کے دوران کلمہ پڑھتے ہوئے دیکھا گیا تھا۔ پولیس نے اسی دن اس ضمن میں پولیس اسٹیشن نگین میں ایک ایف آئی آر درج کیا تھا۔
وقف بورڈ نے اس سلسلے میں کارروائی انجام دیتے ہوئے اپنے ایک بیان میں کہا: ‘آثار شریف حضرت بل کے امام و خطیب ڈاکٹر کمال الدین فاروقی کے خلاف نماز جمعہ کے دوران جبری مذہب تبدیلی کی قیادت کرنے کے الزامات کے پیش نظر وقف کے دفتر واقع سونہ وار میں 8 اپریل کو ایک ہنگامی میٹنگ منعقد ہوئی جس میں اس واقعے اور اس کے متعلق کارروائی انجام دینے کے بارے میں گفت و شنید ہوئی’۔
انہوں نے کہا کہ میٹنگ کے دوران یہ بات نوٹ کی گئی کہ تبدیلی مذہب کے دوران مناسب عمل کی پیروی نہیں کی گئی اور اسلامی اور حکومتی ضوابط پر عمل نہیں کیا گیا۔
بیان کے مطابق میٹنگ کے دوران بورڈ کے تمام اعلیٰ ائمہ و خطبا نے اس بات پر اتفاق کیا کہ اس واقعے سے عوام الناس میں انتشار پیدا ہوا ہےاور یہ واقعہ باہمی بھائی چارے کو زک پہنچانے کا باعث بن سکتا ہے۔میٹنگ کے دوران طے پایا کہ اس معاملے کی تحقیقات کے لئے ایک کمیٹی تشکیل دی جانی چاہئے۔میٹنگ کے دوران ڈاکٹر کمال الدین فاروقی کے تحقیقات مکمل ہونے تک اپنے منصب پر فائز رہنے کو بھی نامناسب گر دانا گیا۔
بیان کے مطابق میٹنگ میں اس واقعے کی تحقیقات کے لئے ایک سہہ رکنی کمیٹی تشکیل دینے کو منظوری دی گئی۔
اس تحقیقاتی کمیٹی کی صدارت جموں وکشمیر وقف بورڈ کے رکن سید محمد حسین کریں گے جبکہ بورڈ ممبر ڈاکٹر غلام نبی حلیم اور سید کرم شاہ صاحب کرن نگر کے امام و خطیب محمد یاسین خان اس کمیٹی کے دوسرے ارکان ہوں گے۔ڈاکٹر کمال الدین فاروقی کو تحقیقات مکمل ہونے تک منصب سے فارغ کیا گیا ہے۔کمیٹی سے سات دنوں کے اندر اندر اپنی رپوٹ پیش کرنے کو کہا گیا ہے۔
