امت نیوز ڈیسک //
سری نگر، 25 اپریل: شمالی کشمیر کے بانڈی پورہ ضلع کے رینجی جنگلاتی علاقے میں جمعرات کو دوسرے دن بھی پولیس اور سیکورٹی فورسز نے تلاشی مہم جاری رکھی۔
ایک اعلیٰ پولیس افسر نے نیوز ایجنسی کشمیر اسکرول کو بتایا کہ بدھ کے روز پولیس، فوج کی 13RR اور CRPF کی ایک مشترکہ ٹیم نے کم از کم دو اور تین ملی ٹینٹوں کی موجودگی کی مخصوص اطلاع کے درمیان بانڈی پورہ کے رینجی جنگلاتی علاقے میں محاصرے اور تلاشی کی کارروائی شروع کی۔
جیسے ہی فورسز کی مشترکہ ٹیم مشتبہ مقام کے قریب پہنچی تو چھپے ہوئے عسکریت پسندوں نے ان پر فائرنگ کردی، جس سے فائرنگ کا تبادلہ شروع ہوگیا۔ انہوں نے کہا کہ تمام خارجی راستوں کو سیل کر دیا گیا ہے اور ملی ٹینٹوں کو فرار ہونے سے روکنے کے لیے لائٹس لگائی گئی ہیں۔ انہوں نے کہا کہ رات بھر سرچ آپریشن جاری رہا اور جمعرات کو بھی جاری ہے۔
ان کا مزید کہنا تھا کہ ملی ٹینٹوں کا سراغ لگانے کے لیے ہیلی کاپٹر اور دیگر سروسز کو استعمال میں لایا گیا ہے جب کہ ملی ٹینٹوں کے فرار ہونے کو بھی رد نہیں کیا جا سکتا۔ (کشمیر اسکرول)
