امت نیوز ڈیسک //
سرینگر: میر واعظ کشمیر ڈاکٹر مولوی محمد عمر فاروق نے ہجری سال کے الوداعی جمعہ کے موقعہ پر اپنے خطاب میں اسلامیان کشمیر پر زور دیا ہے کہ وہ اپنے نفسوں کا محاسبہ کریں اور دیکھیں کہ جن آزمائشوں سے ہم گذر رہے ہیں کہیں اس کی وجہ اللہ کے نزدیک ہمارے ناپسندیدہ اعمال تو نہیں ہیں۔
مرکزی جامع مسجد سرینگر میں اپنے خطاب کے دوران اللہ کے حضور رحمت باراں کے لئے رقعت آمیز دعاﺅں کے دوران میرواعظ نے کہا کہ یہ قوم سال گزشتہ بھی شدید مشکلات اور آزمائشوں سے دوچار رہی ہے اور اس وقت بھی۔
ڈاکٹر مولوی محمد عمر فاروق نے کہا کہ ایک طرف شدید گرمی کی وجہ سے لوگوں کا برا حال ہے اور دوسری طرف رحمت باراں نہ ہونے کی وجہ سے طرح طرح کی مشکلات اور مصائب کا ہمیں سامنا کرنا پڑ رہا ہے۔
میرواعظ نے شدید گرمی کے اس موسم میں بجلی کی قلت کو ریاستی انتظامیہ کی غفلت شعاری قرار دیتے ہوئے کہا کہ سردی کے ایام میں بھی یہاں کے عوام کو بجلی کی شدید قلت کی وجہ سے طرح طرح کے مشکلات کا سامنا رہا ہے اور اب جبکہ کشمیر میں شدید گرمی پڑ رہی ہے تو حکومت عوام کے تئیں پانی اور بجلی جیسی ضروری سپلائی بحال کرنے کے ضمن میں اپنی ذمہ داریوں سے غافل نظر آرہی ہے۔
انہوں نے کہا کہ محرم الحرام کا مہینہ شروع ہو رہا ہے اور یہ انتظامیہ کی ذمہ داری ہے کہ وہ لوگوں کو بجلی اور دیگر اشیائے ضررویہ کی فراہمی کو یقینی بنانے کیلئے اقدامات کریں۔
