امت نیوز ڈیسک //
راجوری، پونچھ: جموں و کشمیر میں عسکریت پسندی کے بڑھتے واقعات کے درمیان پولیس اور فوج کے جوانوں کو بڑی کامیابی ملی ہے۔ ایک اہم کارروائی میں، بھارتی فوج اور جموں و کشمیر پولیس نے ضلع راجوری کے علاقے کالاکوٹ میں عسکریت پسندوں کے ایک ٹھکانے کا کامیابی سے پردہ فاش کیا ہے۔ بھارتی فوج کی راشٹریہ رائفلز یونٹ اور مقامی پولیس نے رات بھر مشترکہ آپریشن کیا جس کے بعد انہوں نے ایک اے کے رائفل اور دیگر گولہ بارود برآمد کیا ہے۔
بھارتی فوج اور مقامی پولیس کالاکوٹ میں عسکریت پسندی کی کارروائیوں کو جڑ سے اکھاڑ پھینکنے کے مقصد سے مسلسل سرچ آپریشن کر رہی ہے۔ اس سلسلے میں اب کالاکوٹ کے بالائی علاقوں سے اسلحہ کا ذخیرہ برآمد ہوا ہے۔ جس کے بعد علاقے کی سکیورٹی کو مدنظر رکھتے ہوئے اہلکاروں نے سرچ آپریشن تیز کر دیا ہے۔ اسلحہ برآمد ہونے کے بعد اب سرچ آپریشن مزید جاری ہے۔ ہتھیار برآمدگی کیس میں ملوث افراد کی شناخت سے متعلق معلومات جلد جاری کیے جانے کا قوی امکان ہے۔
واضح رہے کہ گزشتہ چند ہفتوں سے جموں کا علاقہ عسکریت پسندوں کی جانب سے تخریب کاریوں کا مرکز بن چکا ہے۔ جہاں ہر دوسرے اور تیسرے دن عسکریت پسندوں کی جانب سے کارروائیاں کی جارہی ہیں اور سکیورٹی فورسیز اور عسکریت پسندوں کے درمیان تصادم کے واقعات پیش آ رہے ہیں۔
