امت نیوز ڈیسک //
دہلی: وزیر اعظم نریندر مودی نے نوبل انعام یافتہ پروفیسر محمد یونس کے لیے نیک خواہشات کا اظہار کیا، جنہوں نے بنگلہ دیش کی نگراں حکومت کے سربراہ کے طور پر حلف لیا۔ پی ایم مودی نے بنگلہ دیش میں حالات تیزی سے معمول پر آنے کی امید ظاہر کی اور ملک میں ہندوؤں و دیگر اقلیتی برادریوں کی حفاظت و تحفظ پر زور دیا۔ مودی نے ٹوئٹ کیا کہ ’محمد یونس کو ان کی نئی ذمہ داریاں سنبھالنے پر میری نیک خواہشات۔ ہم ہندوؤں اور دیگر تمام اقلیتی برادریوں کے تحفظ کو یقینی بناتے ہوئے حالات کے جلد معمول ہونے کی امید کرتے ہیں۔ بھارت مشترکہ طور پر دونوں ممالک کے عوام کی سلامتی و ترقی کےلئے بنگلہ دیش کے ساتھ کام کرنے کے لیے پرعزم ہے‘۔
بھارتی وزیر اعظم نریندر مودی نے بنگلہ دیش میں نئی عبوری حکومت کے سربراہ کے طور پر حلف لینے والے محمد یونس کو اپنی "نیک خواہشات” پیش کرتے ہوئے کہا کہ نئی دہلی ہمسایہ ملک ڈھاکہ کے ساتھ کام کرنے کے لئے "پرعزم” ہے۔ شیخ حسینہ کی بے دخلی کے بعد بنگلہ دیش میں اشرار کی جانب سے ہندوؤں پر حملوں کی اطلاعات ملی تھی تاہم اس سلسلہ میں سوشل میڈیا پر متعدد ویڈیوز بھی شیئر کئے گئے جس میں دیکھا گیا کہ بنگلہ دیش میں مسلم نوجوان، منادر اور ہندوؤں کی حفاظت کررہے ہیں۔ اس دوران مودی نے بنگلہ دیش کی نئی عبوری حکومت پر ہندوؤں اور دیگر تمام اقلیتی برادریوں کو تحفظ فراہم کےلئے زور دیا۔
واضح رہے کہ بنگلہ دیش میں پرتشدد احتجاج کے بعد شیخ حسینہ نے وزیر اعظم کے عہدہ سے مستعفی ہوکر بھارت فرار ہوگئیں تھی جسکے بعد فوج نے طلبا تحریک کے رہنماؤں کے مطالبہ کو قبول کرتے ہوئے نوبل انعام یافتہ محمد یونس کی سربراہی میں نئی عبوری حکومت کی تشکیل عمل میں لائی۔
