امت نیوز ڈیسک //
سرینگر :بھارتیہ جنتا پارٹی (بی جے پی) نے سنٹرل الیکشن کمیٹی (سی ای سی) کی میٹنگ کے ایک دن بعد، پیر کو، اسمبلی انتخابات کے لئے 44 امیدواروں کی پہلی فہرست جاری کرنے کے بعد اسے فوری طور پر منسوخ کر دیا۔ بی جے پی نے بعد ازاں اس لسٹ کو دوبارہ شائع کیا جس میں صرف 15امیدواروں کو شامل کیا گیا ہے۔
بی جے کی جانب سے مشتہر کیے گئے پہلے لسٹ میں سینئر سیاسی رہنما کویندر گپتا اور سابق نائب وزیر اعلیٰ نرمل سنگھ کا نام بھی شامل نہیں تھا۔ بی جے پی کی جانب سے لسٹ مشتہر کیے جانے کے چند منٹ بعد ہی بی جے پی نے اس لسٹ کو منسوخ کرکے ایک اور لسٹ جاری کر دی۔ نو ترتیب شدہ لسٹ میں صرف 15امیدواروں کے شامل ہیں جس میں صوبہ کشمیر اور وادی چناب کی نشستوں کے امیدواروں کے ہی نام شامل ہیں جبکہ جموں، جو بی جے پی کا اسٹرانگ ہولڈ ہے، کے امیدواروں کے نام اس لسٹ میں شامل نہیں ہے۔
جموں کشمیر کے بی جے پی یونٹ میں کسی بھی اندرونی خلفشار کی تردید کرتے ہوئے پارٹی کے میڈیا انچارج ڈاکٹر پردیپ ملہوترا نے ای ٹی وی بھارت کے ساتھ بات چیت کے دوران کہا: ’’بی جے پی میں کوئی بھی داخلی خلفشار نہیں بلکہ اس کے بر عکس اخوت و محبت برقرار ہے۔‘‘ تاہم یہ بات واضح ہے کہ دیگر سیاسی جماعتوں کی طرح جموں کشمیر میں منڈیٹ کی تقسیم بی جے پی کے لیے بھی آسان معلوم نہیں ہوتی۔
