امت نیوز ڈیسک //
نئی دہلی: آج صبح پارلیمنٹ میں صدر دروپدی مرمو کے افتتاحی خطاب پر سونیا گاندھی کے تبصرے نے ایک تنازعہ کو جنم دیا ہے۔ بی جے پی نے اسے سینئر سیاستدان کی ‘توہین آمیز تبصرہ’ قرار دیا ہے۔
بی جے پی کا الزام ہے کہ مسز گاندھی نے اپنے بچوں راہول گاندھی اور پرینکا گاندھی واڈرا کے ساتھ صدر مرمو کو ’’بے چاری‘‘ کہا۔ تاہم صدر کے خطاب کے بعد سونیا گاندھی نے کہا تھا کہ طویل روایتی تقریر نے انہیں تھکا دیا ہوگا۔ پارلیمنٹ کے باہر میڈیا سے بات کرتے ہوئے سونیا گاندھی نے کہا کہ صدر آخر تک بہت تھک چکی تھیں۔ وہ مشکل سے فضول تقریر کو پڑھ رہی تھیں۔
بی جے پی نے صدر مرمو کے خلاف ’تضحیک آمیز‘ ریمارکس پر گاندھی خاندان پر حملہ کیا اور کہا کہ کانگریس کی جاگیردارانہ ذہنیت اس حقیقت کو ہضم کرنے سے قاصر ہے کہ ایک قبائلی خاتون ملک کی صدر بن گئی ہیں۔
بی جے پی رکن پارلیمنٹ سکانتا مجمدار نے کہا کہ یہ توہین آمیز تبصرہ ہے۔ سونیا گاندھی اور راہول گاندھی جیسے لیڈروں کو اس طرح کے تبصرے نہیں کرنا چاہئے، خاص طور پر صدر پر۔ دروپدی مرمو کا تعلق ایک قبائلی خاندان سے ہے اور اب وہ ہمارے ملک کی پہلی شہری ہیں اور یہ کانگریس کی جاگیردارانہ ذہنیت کو قبول نہیں ہے۔ اس لیے وہ ان کی تقریر کے خلاف احتجاج کر رہے ہیں۔
