امت نیوز ڈیسک//
سری نگر: پی ڈی پی لیڈر اور پارٹی صدر محبوبہ مفتی کی بیٹی التجا مفتی نے شراب اور منشیات کے پھیلاؤ کو سنجیدہ مسئلہ قرار دیتے ہوئے کہا ہے کہ جموں و کشمیر میں شراب اور منشیات کی وبا آگ کی طرح پھیل رہی ہے۔
ان کا کہنا ہے کہ ہمارے نوجوان نشے کے عادی بن رہے ہیں جو ہمارے سماج کا تانہ بانہ متاثر ہو رہا ہے۔
انہوں نے مرکزی اور جموں و کشمیر سرکار سے اپیل کی کہ وہ جموں وکشمیر کو بھی بہار، گجرات اور تامل ناڈو کی طرح شراب سے پاک خطہ بنائیں۔
موصوف لیڈر نے ان باتوں کا اظہار ہفتے کو یہاں پارٹی ہیڈر کوارٹر میں شراب کے خلاف ایک دستخطی مہم شروع کرنے کے بعد نامہ نگاروں کے ساتھ بات کرنے کے دوران کیا۔
انہوں نے کہا: ‘ہم یہاں شراب اور منشیات کے خلاف ایک دستخطی مہم شروع کرنے کے لئے جمع ہوئے ہیں، جموں و کشمیر میں شراب،منشیات آگ کی طرح پھیل رہے ہیں’۔
ان کا کہنا تھا ‘ہمارے ایک رکن اسمبلی فیاض میر صاحب نے شراب کے خلاف بل متعارف کیا ہے ہماری لوگوں سے اپیل ہے کہ وہ ہماری اس مہم کا بھر پور سپورٹ کریں’۔
انہوں نے کہا کہ ہمارے نوجوان مشنیات اور شراب کے عادی بن رہے ہیں جس سے ہمارے سماج کا تانہ بانہ متاثر ہو رہا ہے۔
التجا نے کہا’ ‘جموں وکشمیر میں گذشتہ چار پانچ برسوں سے شراب آسانی سے دستیاب ہے جس کی وجہ سے یہاں خاندان تباہ ہو رہے ہیں’۔
انہوں نے منشیات کے خلاف جموں وکشمیر پولیس کی کارروائیوں کی سراہنا کرتے ہوئے کہا: ‘جموں وکشمیر پولیس گذشتہ کچھ برسوں سے منشیات کے خلاف بہت اچھا کام کر رہی ہے میری پولیس سے اپیل ہے کہ وہ شراب کے خلاف بھی وسیع پیمانے پر کریک ڈائون شروع کریں’۔
محبوبہ مفتی کی بیٹی نے باقی سیاسی جماعتوں نیشنل کانفرنس، پیپلز کانفرنس اور بی جے پی سے بھی اس مہم کا سپورٹ کرنے کی اپیل کی۔
انہوں نے کہا ‘میری تمام سیاسی جماعتوں سے اپیل ہے کہ وہ ہمارا ساتھ دیں کیونکہ یہ کوئی سیاسی مسئلہ نہیں بلکہ ایک سماجی مسئلہ ہے’۔
ان کا کہنا تھا ‘جموں وکشمیر میں بے روزگاری عروج پر ہے جس کی وجہ سے ہمارے نوجوان منشیات کی طرف مائل ہو رہے ہیں’۔
انہوں نے کہا کہ پی ڈی پی وہ واحد جماعت ہے جس نے شراب کے خلاف بل متعارف کی ہے۔
آنے والےاسمبلی اجلاس سے اس سلسلے میں توقعات ہونے کے بارے میں پوچھے جانے والے ایک سوال کے جواب میں التجا نے کہا: ‘یہاں توقعات کی بات نہیں ہے بلکہ یہ ہماری ایک ذمہ داری ہے جس کو ہم انجام دے رہے ہیں’۔
نیشنل کانفرنس کے ایک رکن اسمبلی کی طرف سے بل لانے کے بارے میں انہوں نے کہا: ‘نیشنل کانفرنس کا بل صرف لالچوک تک محدود ہے ان کے پچاس ارکان اسمبلی ہیں جو کچھ نہیں کرتے ہیں’۔
ان کا کہنا تھا ‘نیشنل کانفرنس نے یہ بل دبائو میں آکر لایا ہے کیونکہ جب پی ڈی پی نے یہ بل لایا تو ان پر دبائو آگیا’۔
التجا نے مرکزی اور جموں و کشمیر سرکار سے اپیل کی کہ وہ جموں وکشمیر کو بھی بہار، گجرات اور تامل ناڈو کی طرح شراب سے پاک خطہ بنائیں۔( یو این آئی)
