امت نیوز ڈیسک //
رامبن، 20 اپریل: اتوار کی صبح رامبن ضلع کے دھرم کنڈ علاقے میں چناب پل کے قریب ایک گاؤں میں بادل پھٹنے سے سیلاب کی وجہ سے دو افراد کی جان چلی گئی جبکہ ایک لاپتہ ہے اور 90 سے زیادہ لوگوں کو بچا لیا گیا۔
ایک اہلکار نے خبر رساں ایجنسی جے کے این ایس کو بتایا کہ اچانک بادل پھٹنے سے ایک مقامی نالے کے پانی کی سطح میں تیزی سے اضافہ ہوا، جو کہ سیلاب میں تبدیل ہو کر گاؤں میں بہہ گیا۔
اہلکار نے بتایا کہ دو افراد کی موت ہو گئی جبکہ ایک لاپتہ ہے جبکہ 90 سے زائد افراد کو بچا لیا گیا ہے، دس گھر مکمل طور پر تباہ ہو گئے ہیں جبکہ 25 سے 30 دیگر کو جزوی نقصان پہنچا ہے۔
جیسے ہی علاقے میں خوف و ہراس پھیل گیا، دھرم کنڈ پولیس نے فوری طور پر ریسکیو آپریشن شروع کیا اور بڑھتے ہوئے پانی میں پھنسے تقریباً 90 تا 100 لوگوں کو کامیابی کے ساتھ باہر نکالا۔
حکام نے نقصان کا اندازہ لگانا شروع کر دیا ہے۔ ریسکیو اور راحت کاری کا عمل تاحال جاری ہے۔
