امت نیوز ڈیسک //
اننت ناگ : امرناتھ یاترا کے پُر امن انعقاد اور یاتریوں کے تحفظ کو یقینی بنانے کے لیے ایک اہم اقدام اٹھاتے ہوئے حکومت نے امرناتھ یاترا کے دونوں راستوں – پہلگام اور بالتل – پر فضائی پابندی عائد کرنے کا فیصلہ کیا ہے۔ جموں و کشمیر یونین ٹیریٹری حکومت نے یاترا کے پورے راستے کو ’’نو فلائنگ زون‘‘ قرار دیا ہے۔ یہ فیصلہ حکومت ہند کی وزارت داخلہ کے مشورہ کے بعد آیا ہے۔
جموں و کشمیر کے محکمہ داخلہ نے امرناتھ یاترا کے بالتل اور پہلگام – دونوں – راستوں کو نو فلائنگ زون قرار دیا ہے۔ اس پابندی کا اطلاق تمام قسم کے ہوائی آلات پر عائد ہوتا ہے جن میں ڈرون اور غبارے وغیرہ شامل ہیں۔
فضائی پابندیاں یکم جولائی سے 10 اگست 2025 تک لاگو رہے گی۔ تاہم، ان پابندیوں کو ہنگامی صورت حال کے دوران نافذ نہیں کیا جائے گا جیسے طبی معاملات کے انخلاء ڈیزاسٹر مینجمنٹ، یا سیکورٹی فورسز کی طرف سے کی جانے والی نگرانی کی کارروائیاں۔ وہیں حکام کا کہنا ہے کہ اس سلسلہ میں جلد ہی باضابطہ طور پر تفصیلی ایس او پیز جاری کیے جائیں گے۔
ادھر، مرکزی داخلہ سیکریٹری گووند موہن امرناتھ یاترا کے لئے سیکورٹی انتظامات کا جائزہ لینے کے لئے آج ایک اعلیٰ سطح کی سیکورٹی میٹنگ کی صدارت ھبی کر رہے ہیں۔
یاد رہے کہ رواں برس امرناتھ یاترا 3 جولائی سے شروع ہوگی اور 9 اگست کو اختتام ہوگی۔ 22 اپریل کے پہلگام حملے کے پیش نظر، مرکزی مسلح نیم فوجی دستوں (سی اے پی ایف) کی 580 کمپنیوں کو یاترا کے ہموار اور پرامن انعقاد کے لیے تعینات کیا جا رہا ہے.
