امت نیوز ڈیسک //
واشنگٹن: امریکی صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر بیان جاری کرتے ہوئے ایران-اسرائیل جنگ بندی کا اعلان کیا اور مبارکباد پیش کی۔ ٹرمپ نے لکھا، تمام لوگوں کو مبارک ہو! اسرائیل اور ایران کے درمیان مکمل جنگ بندی پر اتفاق ہوگیا ہے ۔ ٹرمپ کے مطابق اگلے چھ گھنٹے میں ایران اور اسرائیل اپنے مشن مکمل کریں گے اور اگلے 12 گھنٹے میں جنگ ختم ہو جائے گی۔
ٹرمپ نے مزید کہا کہ جنگ بندی ایران شروع کرے گا اور 12ویں گھنٹے پر اسرائیل کی جانب سے جنگ روکنے کا آغاز ہوگا اور پھر 24 گھنٹے بعد بارہ روزہ جنگ کا باضابطہ خاتمہ ہو جائے گا۔ ٹرمپ نے لکھا، دنیا اسے سراہے گی۔
امریکی صدر نے کہا کہ جنگ بندی کے دوران دوسرا فریق پر امن رہے گا اور اس کا احترام کرےگا۔ ٹرمپ نے اسرائیل اور ایران دونوں ممالک کو مبارکباد دی اور کہا کہ ایران اور اسرائیل نے جنگ کو ختم کرنے کے لیے ہمت اور ذہانت کا مظاہرہ کیا۔
ایران نے جنگ بندی معاہدے کے ٹرمپ کے دعوے کو مسترد کر دیا:
ایران کا کہنا ہے کہ ابھی تک کسی جنگ بندی پر کوئی معاہدہ نہیں ہوا ہے۔ایرانی وزیر خارجہ عباس عراقچی کا کہنا ہے کہ ابھی تک کسی جنگ بندی یا فوجی کارروائیوں کو روکنے کا کوئی معاہدہ نہیں ہوا ہے۔
انھوں نے سوشل میڈیا ایکس پر مزید لکھا، "تاہم، بشرطیکہ اسرائیلی حکومت تہران کے وقت کے مطابق صبح 4 بجے کے بعد ایرانی عوام کے خلاف اپنی غیر قانونی جارحیت بند کر دے، ہمارا اس کے بعد اپنا ردعمل جاری رکھنے کا کوئی ارادہ نہیں ہے،”
عباس عراقچی نے واضح کیا کہ، ہماری فوجی کارروائیوں کے خاتمے کا حتمی فیصلہ بعد میں کیا جائے ۔
