امت نیوز ڈیسک//
نئی دہلی: ‘آپریشن سندھور’ کی منصوبہ بندی میں کلیدی کردار ادا کرنے والے سینئر آئی پی ایس افسر پراگ جین کو ریسرچ اینڈ اینالیسس ونگ (را) کا نیا سربراہ مقرر کیا گیا ہے۔ جین، پنجاب کیڈر کے 1989 بیچ کے آئی پی ایس افسر ہیں، وہ یکم جولائی کو چارج سنبھالیں گے۔ وہ روی سنہا کی جگہ لیں گے، جو 30 جون کو ریٹائر ہو رہے ہیں۔ را کے سربراہ کے طور پر جین کی مدت کار دو سال ہوگی۔
ہفتہ کو جاری کردہ سرکاری حکم نامے میں کہا گیا، "کابینہ کی تقرریوں کی کمیٹی نے پراگ جین کو کیبنٹ سیکریٹریٹ کے تحت سکریٹری، ریسرچ اینڈ انالیسس ونگ (RAW) کے طور پر تقرری کی منظوری دے دی ہے۔ ان کی میعاد عہدہ سنبھالنے کی تاریخ سے دو سال کے لیے ہوگی۔
حکام نے بتایا کہ جین کو انٹیلی جنس ایجنسی را کا سربراہ مقرر کرنے کا فیصلہ اس ہفتے کے شروع میں کابینہ کی تقرری کمیٹی نے کیا تھا۔
جین، پنجاب کیڈر کے 1989 بیچ کے انڈین پولیس سروس (آئی پی ایس) افسر، را میں دو دہائیوں سے زیادہ کا تجربہ رکھتے ہیں۔ ان کے کیریئر میں پنجاب میں خالستانی تحریک کے عروج کے دوران اہم آپریشنل شراکتیں شامل ہیں، جہاں انہوں نے مختلف اضلاع میں ایس ایس پی اور ڈپٹی انسپکٹر جنرل آف پولیس کے طور پر خدمات انجام دیں۔
