امت نیوز ڈیسک //
تحصیل مینڈھر کے گاؤں نکہ مجھاری، محلہ کوٹے شر خان میں عوام گزشتہ کئی دنوں سے پانی کی شدید قلت کا سامنا کر رہی ہے۔ مقامی لوگوں کے مطابق پینے کے پانی کی سپلائی دینے والی پائپ لائنیں ٹوٹی ہوئی ہیں، جس کے باعث پورے علاقے کو پانی نہیں مل رہا۔
اہم بات یہ ہے کہ کئی بار شکایت کرنے کے باوجود محکمہ جل شکتی کا کوئی بھی ملازم یا افسر موقع پر نہیں پہنچا۔ محکمہ کی عدم توجہی اور لاپرواہی سے تنگ آ کر آج مقامی لوگوں نے خود ہی پائپ لائنوں کی مرمت شروع کر دی، تاکہ پانی کی فراہمی بحال ہو سکے۔
ایک مقامی شہری نے میڈیا سے بات کرتے ہوئے کہا:”ہم نے بار بار افسران سے رابطہ کیا، لیکن نہ کوئی آیا، نہ کسی نے ہماری بات سنی۔ آخرکار ہمیں خود ہی ہتھوڑی اور اوزار لے کر پائپیں جوڑنی پڑیں۔ کیا یہی اچھے دن ہیں؟ کیا عوام خود اپنا کام کرے گی؟”
ایک اور بزرگ شہری نے کہا:”یہ محکمہ جل شکتی کے لیے شرم کی بات ہے کہ ہم عوام خود پانی کی لائنیں ٹھیک کر رہے ہیں، جو کہ ان کا فرض ہے۔ حکومت سے پوچھا جانا چاہیے کہ ہم ٹیکس کیوں دیتے ہیں؟”
کئی گھروں میں پچھلے چار دنوں سے ایک بوند پانی نہیں آیا،خواتین اور بچے دور دور سے پانی لانے پر مجبور
مقامی لوگوں نے مطالبہ کیا ہے کہ:
فوری طور پر پائپ لائنوں کی مکمل مرمت کی جائے . غفلت برتنے والے ملازمین کے خلاف کارروائی ہو
مستقل حل کے لیے نیا واٹر پروجیکٹ دیا جائے.
یہ صورتحال نہ صرف انتظامیہ کی ناکامی کو ظاہر کرتی ہے بلکہ یہ بھی ثابت کرتی ہے کہ عوام اپنے مسائل خود حل کرنے پر مجبور ہو چکی ہے۔
