امت نیوز ڈیسک //
سرینگر، 27 جولائی:جموں و کشمیر یتیم ٹرسٹ نے اپنے صدر دفتر اقبال پارک سرینگر میں 53 واں سالانہ دن اور 37 واں ٹک زینگری ڈے عقیدت و احترام کے ساتھ منایا۔ یہ تقریب ٹرسٹ کے بانی مرحوم عبدالخالق ٹاک زینگریؒ کی لازوال خدمات اور انسانیت دوستی کو خراجِ عقیدت پیش کرنے کے لیے منعقد کی گئی۔تقریب کا اہم حصہ ٹاک زینگری ایوارڈ 2025 کی تقسیم تھا، جو اُن شخصیات اور اداروں کو دیا جاتا ہے جنہوں نے بے لوث خدمت، اعلیٰ اخلاقی اقدار اور سماجی فلاح میں نمایاں کردار ادا کیا ہو۔اس سال سابق چیف لائبریرین کشمیر یونیورسٹی پروفیسر عبدالمجید باباکو تعلیمی میدان میں، عمر وانی کی ہیلپنگ ہینڈ فاؤنڈیشن کو سماجی خدمت میں اور ڈائریکٹر اسکول ایجوکیشن کشمیر ڈاکٹرجی این ایتو، کو انتظامی خدمات کے اعتراف میں ایوارڈز سے نوازا گیا۔تقریب میں سابق جسٹس بشیر احمد کرمانی، جی این ایتو سمیت متعدد سماجی کارکن اور یتیم بچوں کی بڑی تعداد نے شرکت کی۔ٹرسٹ کے چیئرمین ظہور احمد ٹاک نے میڈیا سے گفتگو کرتے ہوئے بتایا کہ جموں و کشمیر بھر میں ٹرسٹ کے 80 سے زائد یونٹس فعال ہیں، جن میں ہزاروں یتیم بچوں کو تعلیم، رہائش، خوراک اور دیگر سہولیات** فراہم کی جاتی ہیں۔ انہوں نے کہا کہ "ہر سال یتیم بچیوں کے لیے شادی کٹس تقسیم کی جاتی ہیں اور ان کی مکمل کفالت کی جاتی ہے تاکہ وہ باعزت زندگی گزار سکیں۔”انہوں نے کہا کہ ٹرسٹ کا مقصد انسانیت کی خدمت ہے اور ہم بانی کے مشن کو لے کر سماج کے کمزور طبقات تک اپنی رسائی کو مسلسل وسعت دے رہے ہیں۔یہ تقریب مرحوم ٹک زینگری صاحب کی یاد میں تجدیدِ عہد کا دن ثابت ہوئی، جس میں خدمتِ خلق، تعلیم، اور اخلاقی اقدار کے فروغ کا پیغام نمایاں رہا۔
