امت نیوز ڈیسک //
سرینگر، 31 اگست: سرینگر میں حکام نے محکمہ موسمیات کی پیش گوئی کے بعد موسم کی وارننگ جاری کی ہے، جس کے مطابق یکم ستمبر تک ضلع کے کئی حصوں میں بھاری بارشوں اور تیز ہواؤں کا امکان ہے۔
ضلعی انتظامیہ نے عوام کو مشورہ دیا ہے کہ خاص طور پر فقیر گجری، کھونموہ اور ملحقہ پہاڑی علاقوں میں رہنے والے لوگ ڈھلوانوں اور آبی ذخائر کے قریب جانے سے گریز کریں۔ شکارا والوں اور سیاحوں کو ڈل اور نگین جھیل میں سیر و تفریح عارضی طور پر روکنے کی ہدایت دی گئی ہے، جبکہ دریائے جہلم کے کنارے ریت نکالنے والے مزدوروں کو بھی اپنا کام فی الحال بند رکھنے کو کہا گیا ہے۔
حکام نے بتایا کہ یہ ایڈوائزری بطور احتیاط جاری کی گئی ہے تاکہ خراب موسم کے دوران کسی ناخوشگوار واقعے سے بچا جا سکے۔ ہنگامی صورتحال میں عوام کی سہولت کے لیے ایمرجنسی ہیلپ لائن نمبر بھی جاری کر دیے گئے ہیں۔ (کے این سی)
