امت نیوز ڈیسک //
نیویارک: اقوام متحدہ کی جنرل اسمبلی نے مسئلہ فلسطین کے دو ریاستی حل کی قرارداد بھاری اکثریت سے پاس کرلی۔اقوام متحدہ کی جنرل اسمبلی نے جمعہ کو فرانس اور سعودی عرب کی جانب سے پیش کی گئی مسئلہ فلسطین کے دو ریاستی حل کی قرارداد منظور کی۔یہ قرارداد 142 ممالک کی اکثریت سے منظور ہوئی جبکہ مخالفت میں 10 ووٹ پڑے۔
امریکا اور اسرائیل سمیت 12 ممالک نے ووٹنگ میں حصہ نہیں لیا۔عرب میڈیا کے مطابق 7 صفحات پر مشتمل یو این اعلامیہ جولائی میں سعودیہ، فرانس کی میزبانی میں بین الاقوامی کانفرنس کا نتیجہ ہے۔
دوسری جانب اسرائیل نے دو ریاستی حل سے متعلق اقوام متحدہ کا اعلامیہ مسترد کر دیا۔اسرائیل نے 142 رکن ممالک کی حمایت یافتہ تاریخی ووٹ کو ’شرمناک‘ قرار دیتے ہوئے کہا ہے کہ وہ غزہ پر حملے جاری رکھے ہوئے ہے۔
واضح رہے کہ اسرائیلی وزیراعظم نے گزشتہ روز فلسطینی مغربی کنارے میں نئی متنازع آباد کاری کے توسیعی منصوبے پر دستخط کرتے ہوئے دو ریاستی حل کی طرف جانے اور فلسطینی ریاست کو تسلیم کرنے کا انکار کیا۔رپورٹ کے مطابق نیتن یاہو نے اس موقع پر کہا کہ ‘یہ زمین ہماری ہے اور ہم اپنا وعدہ پورا کرنے جارہے ہیں کہ یہاں کوئی فلسطینی ریاست نہیں بنے گی۔
فلسطین کی وزارت خارجہ نے دو ریاستی حل کے لیے “قابل عمل لائحہ عمل” بنانے کے لیے سعودی فرانس کی کوششوں کا خیر مقدم کیا۔ وزارت نے “اسرائیلی استعماری قبضے کے خاتمے کے لیے تمام میکانزم کو فعال کرنے” اور “فلسطینی عوام کے جائز حقوق کے حصول” پر بھی زور دیا۔
