امت نیوز ڈیسک //
سرینگر، 15 ستمبر:لیفٹیننٹ گورنر منوج سنہا نے پیر کو کہا کہ کشمیر سے نئی دہلی تک پارسل ٹرین سروس وادی کی معیشت کو زبردست تقویت دے گی۔
نوگام ریلوے اسٹیشن سے جوائنٹ پارسل پروڈکٹ – ریپڈ کارگو سروس کو ہری جھنڈی دکھانے کے بعد صحافیوں سے گفتگو کرتے ہوئے ایل جی سنہا نے کہا:”قومی دارالحکومت تک روزانہ مقررہ وقت کی ٹرین کے ذریعے باغبانی کی پیداوار پہنچانا کسانوں اور فروٹ گروورز کے لیے بڑا ریلیف ہے۔ میں ریلوے حکام کا اس شاندار اقدام کے لیے شکر گزار ہوں۔”
انہوں نے کہا کہ "ٹپوگرافی مسائل اور خراب موسمی حالات کی وجہ سے نیشنل ہائی وے اکثر بند ہو جاتا ہے، جس کے نتیجے میں خراب ہونے والی اشیاء کو بھاری نقصان پہنچتا ہے۔ ریلوے پارسل سروسز کی شروعات اس مسئلے کے حل کی طرف ایک بڑا قدم ہے۔”
دریں اثنا، ریلوے حکام نے کے این او کو بتایا کہ یہ پارسل سروس بڈگام سے آدرش نگر (نئی دہلی) تک چلے گی اور جموں کے باری برہمنہ اسٹیشن پر ایک مقررہ اسٹاپ ہوگا۔ ٹرین میں آٹھ پارسل کوچ ہیں جن کی گنجائش 23 ٹن فی کوچ ہے اور ابتدائی طور پر اس میں سیب اور اخروٹ بھیجے جائیں گے۔
حکام کے مطابق یہ سہولت لاجسٹکس کو مزید مؤثر بنائے گی، وقت پر لوڈنگ کو ممکن بنائے گی اور ٹرانزٹ کے دوران ہونے والے نقصانات کو کم کرے گی۔ پہلی ٹرین نے تقریباً 2.5 کروڑ روپے مالیت کا پھل لے کر 24 گھنٹے کے اندر دہلی پہنچایا۔
ریلوے حکام کے مطابق، اسی طرز پر ایک اور 15 کوچز پر مشتمل وی پی ٹرین اننت ناگ سے بھی جلد شروع ہوگی، جو خاص طور پر سیب کی ترسیل کے لیے ہوگی۔
عہدیداروں نے کہا کہ یہ اقدام صرف کشمیر ہی نہیں بلکہ پورے جموں و کشمیر اور انڈین ریلوے کے لیے فخر کا لمحہ ہے۔ ــــ (کے این او)
