امت نیوز ڈیسک //
سرینگر، 31 اکتوبر: جموں و کشمیر قانون ساز اسمبلی کا نو روزہ خزاں اجلاس جمعہ کو اپنے ایجنڈے کی تکمیل کے بعد اسپیکر عبد الرحیم راتھر نے غیر معینہ مدت تک ملتوی کر دیا۔
اجلاس کے دوران ایوان میں چار راجیہ سبھا نشستوں کے انتخابات کرائے گئے اور پانچ سرکاری بل منظور کیے گئے۔ 41 نجی اراکین کے بلوں میں سے صرف 8 پر بحث کی گئی، جن میں سے بیشتر کو حکومت کی یقین دہانی پر واپس لیا گیا یا تعارف کے مرحلے پر ہی ووائس ووٹ کے ذریعے مسترد کر دیا گیا۔
اجلاس مجموعی طور پر پُرامن رہا، تاہم ایک موقع پر اودھمپور کے رکن اسمبلی پون گپتا کی جانب سے سیلاب متاثرین پر بحث کی التوا کی تحریک مسترد کیے جانے پر بی جے پی ارکان نے واک آؤٹ کیا۔
اسپیکر عبد الرحیم راتھر نے تمام اراکین کا شکریہ ادا کرتے ہوئے کہا کہ اجلاس کے دوران تعمیری بحث و مباحثہ اور قانون سازی کا عمل بخوبی انجام پایا۔
