امت نیوز ڈیسک //
گاندربل، 27 نومبر:پارلیمنٹ ممبر آغا روح اللہ مہدی نے آج تولہ مُلہ گاندربل کا دورہ کیا، جہاں ان کا کہنا تھا کہ انہیں مقامی لوگوں نے اپنے مسائل اور شکایات سننے کے لیے مدعو کیا تھا۔
میڈیا سے بات کرتے ہوئے آغا روح اللہ نے کہا کہ انہیں نیشنل کانفرنس کی کسی ورکنگ کمیٹی میٹنگ کے بارے میں کوئی علم نہیں تھا۔
انہوں نے کہا: “مجھے نہیں معلوم کون سی میٹنگ چل رہی ہے۔ مجھے کسی نے مدعو نہیں کیا۔ اس کا پتا بھی مجھے آپ لوگوں کے ذریعے ہی لگا۔”
نیشنل کانفرنس کے انتخابی مینڈیٹ پر بات کرتے ہوئے انہوں نے ایک بار پھر مؤقف دہرایا کہ عوام نے پارٹی کو ایسے وعدوں کی بنیاد پر ووٹ دیا تھا جن میں آرٹیکل 370 اور ریاستی درجہ کی بحالی شامل ہے۔
انہوں نے کہا: “ہم بی جے پی کی زبان نہیں بول سکتے جب ہمیں عوام نے ان وعدوں کی بنیاد پر مینڈیٹ دیا ہے۔”
آغا روح اللہ نے زور دیتے ہوئے کہا کہ پارٹی کو اپنے بنیادی وعدوں اور اصولی مؤقف پر قائم رہنا چاہیے۔
