امت نیوز ڈیسک /
سرینگر، 4 دسمبر: پچھلے پانچ برسوں کے دوران جموں و کشمیر میں تقریباً 50 ہزار راشن کارڈ منسوخ کیے گئے ہیں۔ یہ کارروائی پردھان منتری غریب کلیان انا یوجنا کے تحت مستحقین کی ملک گیر سطح پر کی گئی تصدیق کے بعد عمل میں لائی گئی، جس کی اطلاع مرکزی حکومت نے آج لوک سبھا کو دی۔
یہ اعداد و شمار وزارتِ امورِ صارفین، خوراک اور عوامی تقسیم کی جانب سے دیے گئے تحریری جواب میں پیش کیے گئے۔
وزارت کے مطابق، جموں و کشمیر میں 2021 میں 33,677، سال 2022 میں 2,927، سال 2023 میں 5,403، سال 2024 میں 4,767 اور سال 2025 میں اب تک 3,036 راشن کارڈ حذف کیے گئے، جس سے مجموعی تعداد 49,810 تک پہنچ گئی۔
مرکز کے زیرِ انتظام خطے لداخ میں 2021 میں 614، 2022 میں 30، 2023 میں 58، 2024 میں 615 اور سال 2025 میں اب تک 764 راشن کارڈ منسوخ کیے گئے — یوں لداخ میں مجموعی تعداد 2,081 ہوگئی۔
یہ مشق اُن ہدایات کے بعد شروع کی گئی جن میں ریاستوں اور مرکز کے زیرِ انتظام علاقوں کو ہدایت دی گئی تھی کہ وہ 2024–25 میں محکمۂ خوراک و عوامی تقسیم کی جانب سے کیے گئے بڑے ڈیٹا اینالیٹکس پروجیکٹ میں سامنے آنے والی بے ضابطگیوں کی بنیاد پر فیلڈ ویریفکیشن کریں۔
اس اینالیٹکس مشق — جس میں آدھار، سی بی ڈی ٹی، موآر ٹی ایچ، ایم سی اے اور سی بی آئی سی کے ڈیٹا بیس استعمال کیے گئے — میں پورے ملک میں تقریباً 8.51 کروڑ مشکوک مستفیدین کی نشاندہی کی گئی۔
ان میں 100 سال سے زائد عمر کے افراد، ڈپلیکیٹ راشن کارڈ رکھنے والے، ’’خاموش‘‘ (یعنی بغیر کسی لین دین والے) راشن کارڈ، اور نابالغوں کے نام پر بنے سنگل ممبر کارڈ شامل تھے۔
وزارت نے کہا کہ ریاستوں اور مرکز کے زیر انتظام علاقوں کو ہدایت دی گئی تھی کہ وہ ان ریکارڈز کی جسمانی طور پر تصدیق کریں اور نااہل ناموں کو فہرستوں سے ہٹائیں۔
اب تک ملک بھر میں حکومتوں نے 2.12 کروڑ ایسے مستفیدین کو اپنے نظام سے خارج کر دیا ہے۔
جواب میں مزید بتایا گیا کہ تکنیکی اقدامات — جیسے راشن کارڈوں کی ڈیجیٹائزیشن، آدھار سیڈنگ، ڈی ڈپلیکیشن، اموات یا مستقل نقل مکانی کا پتہ لگانا — کی مدد سے ریاستوں نے 2021 سے 2025 کے درمیان تقریباً 2.25 کروڑ راشن کارڈ منسوخ کیے۔
حکومت کا کہنا ہے کہ یہ اقدامات ٹارگٹڈ پبلک ڈسٹریبیوشن سسٹم (TPDS) کے تحت سبسڈائزڈ اناج کی بہتر اور درست تقسیم کو یقینی بنانے کے لیے کیے جا رہے ہیں۔
اگرچہ مرکز PMGKAY اور نیشنل فوڈ سکیورٹی ایکٹ (NFSA) کے تحت اناج کی فراہمی کرتا ہے، تاہم اہل خاندانوں کی شناخت، راشن کارڈ جاری کرنے اور فیئر پرائس شاپس کی نگرانی کی ذمہ داری ریاستوں اور مرکز کے زیرِ انتظام علاقوں— بشمول جموں و کشمیر اور لداخ — پر ہی ہے۔
