امت نیوز ڈیسک //
فوڈ سیفٹی ڈیپارٹمنٹ اننت ناگ نے PRIYAGOLD BUTTER DELITE بسکوٹس (بیچ نمبر E25KPO2FB) کی فروخت پر فوری اور سخت پابندی عائد کر دی ہے، کیونکہ لیبارٹری جانچ میں یہ پروڈکٹ انسانی استعمال کے لیے غیر محفوظ پائی گئی ہے۔
ڈیزائنٹڈ آفیسر فوڈ سیفٹی اننت ناگ کے مطابق، یہ کارروائی معمول کی مارکیٹ چیکنگ کے دوران فوڈ سیفٹی آفیسر کی جانب سے نمونے حاصل کیے جانے کے بعد عمل میں لائی گئی۔ نمونہ نیشنل فوڈ لیبارٹری غازی آباد کو بھیجا گیا تھا، جہاں ماہرین نے اپنی رپورٹ (نمبر JK-665/DEC/25/786 مؤرخہ 05-12-2025) میں سلفائٹ کی مقدار مقررہ حد سے کہیں زیادہ پائی۔
محکمے نے بتایا کہ سلفائٹ کی زائد مقدار والی اشیائے خوردونوش انسانی صحت کے لیے سنگین مسائل کا سبب بن سکتی ہیں۔ حکم نامے میں واضح کیا گیا ہے کہ غیر محفوظ خوراک کی تیاری یا فروخت فوڈ سیفٹی اینڈ اسٹینڈرڈز ایکٹ 2006 کی دفعہ 3(1)(zz)(xi) کے تحت سختی سے ممنوع ہے۔
محکمہ افسر شیخ ضمیر احمد نے FSSA کی دفعہ 36(3)(b) کے تحت اختیارات استعمال کرتے ہوئے ضلع اننت ناگ میں متعلقہ بیچ کی فروخت پر فوری مکمل پابندی عائد کرنے کے احکامات جاری کیے ہیں۔
محکمے نے تمام تاجروں، دکانداروں اور ڈسٹریبیوٹرز کو ہدایت دی ہے کہ وہ فوراً یہ پروڈکٹ اپنی شیلف سے ہٹا دیں اور احکامات کی مکمل پابندی کو یقینی بنائیں۔ (کے این سی)
