امت نیوز ڈیسک //
ہندواڑہ، 20 دسمبر : گورنمنٹ میڈیکل کالج ہندواڑہ کے اسوسی ایٹڈ ہسپتال میں تعینات ایک جونیئر ریزیڈنٹ ڈاکٹر کو ایک وائرل ویڈیو سامنے آنے کے بعد فوری طور پر معطل کر دیا گیا ہے۔ ویڈیو میں ایک مریض کو ہسپتال کے باہر ٹرالی پر لاوارث حالت میں پڑا دکھایا گیا ہے، جس پر عوامی حلقوں میں شدید تشویش پائی جا رہی ہے۔
سوشل میڈیا پر بڑے پیمانے پر شیئر ہونے والی اس فوٹیج کے بعد انتظامیہ نے فوری کارروائی عمل میں لائی۔ خبر رساں ادارے کشمیر نیوز ٹرسٹ (کے این ٹی) کو حکام نے بتایا کہ مذکورہ ڈاکٹر، جو ہسپتال میں سیکیورٹی انچارج کا اضافی چارج بھی سنبھال رہے تھے، کو ابتدائی تحقیقات مکمل ہونے تک معطل کر دیا گیا ہے۔
حکام کے مطابق وائرل ویڈیو نے مریضوں کی دیکھ بھال اور ہسپتال کے اندرونی نگرانی کے نظام پر سنگین سوالات کھڑے کر دیے ہیں۔
واقعے کی تحقیقات کے لیے سینئر ڈاکٹروں اور انتظامی افسران پر مشتمل پانچ رکنی کمیٹی تشکیل دی گئی ہے، جسے ہدایت دی گئی ہے کہ وہ واقعے کی مکمل تفصیلات کا جائزہ لے کر ایک دن کے اندر اپنی رپورٹ پیش کرے۔ ہسپتال انتظامیہ کا کہنا ہے کہ کمیٹی کی رپورٹ کی بنیاد پر مزید کارروائی عمل میں لائی جائے گی۔ [کے این ٹی]
