امت نیوز ڈیسک //
سرینگر: عوامی اتحاد پارٹی (اے آئی پی) کے کوکرناگ حلقے کے صدر انور فمدہ کو پبلک سیفٹی ایکٹ (پی ایس اے) کے تحت حراست میں لے کر ضلع جیل بھدرواہ منتقل کر دیا گیا ہے۔
خبر رساں ایجنسی جی این ایس نے سرکاری ذرائع کے حوالے سے بتایا کہ انور فمدہ کو 14 نومبر 2025 کو ہنگل گنڈ میں پیش آئے ایک واقعے کے سلسلے میں پولیس نے حراست میں لیا تھا۔ ان پر الزام ہے کہ انہوں نے ایک پولیس اسٹیشن میں ہنگامہ آرائی کی اور گوجر طبقے کے کچھ افراد کے ساتھ جھگڑے میں ملوث رہے۔
واقعے کے بعد ان کے خلاف ایف آئی آر نمبر 121/2025 درج کی گئی، جس میں بھارتیہ نیائے سنہتا (بی این ایس) کی دفعات 126(2)، 109 اور 309 شامل ہیں۔ گرفتاری کے بعد انور فمدہ کو عدالت میں پیش کیا گیا، جہاں سے انہیں عدالتی تحویل میں بھیج دیا گیا۔ بعد ازاں انہیں ضلع جیل اننت ناگ میں رکھا گیا۔
ذرائع کے مطابق بعد میں ضلع انتظامیہ نے پبلک سیفٹی ایکٹ کے تحت ان کے خلاف حفاظتی حراست کا حکم جاری کیا۔ یہ حکم نامہ آرڈر نمبر DMA/PSA/DET/2025 مورخہ یکم دسمبر 2025 کے تحت جاری کیا گیا۔
مزید بتایا گیا کہ 19 دسمبر 2025 کو انور فمدہ کو ضلع جیل اننت ناگ سے ضلع جیل بھدرواہ منتقل کیا گیا، جہاں وہ پی ایس اے کے تحت مزید حراست میں رہیں گے۔
تاہم، اس گرفتاری اور حراست کے معاملے پر عوامی اتحاد پارٹی کی جانب سے تاحال کوئی سرکاری بیان جاری نہیں کیا گیا ہے۔
