امت نیوز ڈیسک //
جموں، 29 دسمبر : پولیس نے سوشل میڈیا پر ایک ویڈیو اپ لوڈ کر کے اسے فرقہ وارانہ رنگ دینے اور عوامی امن و امان میں خلل ڈالنے کی کوشش کرنے پر ایک شخص کو حراست میں لے لیا ہے۔
جی این ایس کو جاری ایک بیان میں پولیس نے بتایا کہ گزشتہ روز ایک برادری کے افراد جنگل سے لکڑی کے گٹھے لا رہے تھے، اسی دوران ایک لکڑی پھسل کر مدرسہ کے قریب جا رکی، جس کے نتیجے میں دو برادریوں کے درمیان تلخ کلامی ہو گئی۔ یہ واقعہ پولیس پوسٹ پڈیئرنا کے دائرہ اختیار میں پیش آیا، جو بعد ازاں دونوں جانب سے پتھراؤ میں تبدیل ہو گیا، جس میں چند افراد کو معمولی چوٹیں آئیں۔
پولیس کے مطابق اس واقعہ کا نوٹس لیتے ہوئے ضلع کشتواڑ پولیس نے ایف آئی آر نمبر 262/25 زیر دفعات 125، 125(a)، 191(2) بی این ایس درج کر کے تحقیقات شروع کر دی ہیں۔
اسی دوران آج کشتواڑ کے ایک شخص نے واقعہ کی ویڈیو سوشل میڈیا پر اپ لوڈ کی، جس میں اسے ایک مذہبی مقام پر حملہ قرار دے کر فرقہ وارانہ رنگ دینے کی کوشش کی گئی، جس سے عوامی امن و امان متاثر ہوا۔ اس سلسلے میں پولیس اسٹیشن کشتواڑ میں ایف آئی آر نمبر 263/25 زیر دفعہ 353 بی این ایس درج کی گئی اور مذکورہ شخص کو حراست میں لے لیا گیا ہے۔
پولیس نے عوام سے اپیل کی ہے کہ سوشل میڈیا اور دیگر ڈیجیٹل پلیٹ فارمز کے استعمال میں انتہائی احتیاط اور ذمہ داری کا مظاہرہ کریں۔ بیان میں کہا گیا ہے کہ اس طرح کی سرگرمیوں میں ملوث پائے جانے والے افراد کے خلاف قانون کے مطابق سخت کارروائی عمل میں لائی جائے گی۔
