امت نیوز ڈیسک //
بنگلہ دیش کی وزارتِ اطلاعات و نشریات نے پیر (5 جنوری) کو اطلاع دی کہ بنگلہ دیش میں انڈین پریمیئر لیگ (آئی پی ایل) کے میچوں کی نشریات نہیں کی جائیں گی۔ وزارت نے دنیا کی سب سے مقبول کرکٹ لیگ کی نشریات پر غیر معینہ مدت کی پابندی کی وجہ 2026 سیزن کے لیے کولکاتا نائٹ رائیڈرز (کے کے آر) کی ٹیم سے بنگلہ دیش کے تیز گیند باز مستفیض الرحمٰن کو باہر کیا جانا بتایا ہے۔ وزارت کے مطابق مستفیض الرحمٰن کو آئی پی ایل سے خارج کیے جانے پر بنگلہ دیش کے شہری دکھی اور ناراض ہیں، اسی وجہ سے لیگ کی نشریات روک دی گئی ہیں۔
وزارتِ اطلاعات و نشریات نے کہا کہ اطلاع دی جاتی ہے کہ ہندوستانی کرکٹ بورڈ نے کولکاتا نائٹ رائیڈرز کو بنگلہ دیش کے مستفیض الرحمٰن کو انڈین پریمیئر لیگ سے ریلیز کرنے کی ہدایت دی ہے، جو 26 مارچ سے شروع ہونے والی ہے۔ اس فیصلے سے بنگلہ دیش کے شہریوں کے جذبات مجروح ہوئے ہیں اور وہ ناراض ہیں۔ اسی بنا پر ہدایت کے مطابق انڈین پریمیئر لیگ کے تمام میچوں اور پروگراموں کی نشریات/ٹیلی کاسٹ روکنے کی درخواست کی جاتی ہے۔
آصف نذرال نے پابندی کی بات کہی تھی
وزارتِ اطلاعات و نشریات کا یہ قدم بنگلہ دیش میں محمد یونس کی قیادت والی عبوری حکومت کے نوجوانوں اور کھیلوں کے امور کے مشیر آصف نذرال کے فیس بک پر دیے گئے بیان کے ایک دن بعد سامنے آیا ہے۔ آصف نذرال نے کہا تھا کہ انہوں نے ملک کے اطلاعات و نشریات کے مشیر سے بنگلہ دیش میں آئی پی ایل میچوں کی نشریات نہ کرنے کی درخواست کی ہے۔ اپنے بیان کے آخر میں انہوں نے کہا کہ ہم بنگلہ دیش کی کرکٹ، کرکٹرز اور ملک کی کسی بھی توہین کو برداشت نہیں کریں گے۔ غلامی کے دن ختم ہو چکے ہیں۔
ہندوستان جانے سے انکار
بنگلہ دیش نے 2026 مینز ٹی20 ورلڈ کپ کے لیے ہندوستان جانے سے انکار کر دیا ہے۔ اس کی اطلاع اتوار (4 جنوری) کو آئی سی سی کو دی گئی۔ بنگلہ دیش کرکٹ بورڈ (بی سی بی) نے دونوں ملکوں کے درمیان بگڑتے سیاسی تعلقات کے پس منظر میں کھلاڑیوں کی “سلامتی” پر تشویش ظاہر کی ہے۔ بنگلہ دیش کے ٹی20 ورلڈ کپ کے میچ کولکاتا اور ممبئی میں ہونے ہیں۔ اس کا پہلا میچ 7 فروری کو ایڈن گارڈنز میں ویسٹ انڈیز کے خلاف شیڈول ہے۔
