امت نیوز ڈیسک //
جموں، 7 جنوری : مرکزی وزیر داخلہ امیت شاہ جمعرات کو نئی دہلی میں جموں و کشمیر کی سکیورٹی صورتحال پر ایک اعلیٰ سطحی جائزہ اجلاس کی صدارت کریں گے۔ اجلاس میں جموں و کشمیر کے لیفٹیننٹ گورنر منوج سنہا، جے کے پولیس، سول انتظامیہ، سینٹرل آرمڈ پولیس فورسز ، خفیہ ایجنسیوں اور وزارت داخلہ کے اعلیٰ حکام شرکت کریں گے۔
یہ اجلاس سال 2026 میں جموں و کشمیر سے متعلق پہلا اعلیٰ سطحی سکیورٹی جائزہ اجلاس ہوگا۔ اجلاس ایسے وقت میں منعقد ہو رہا ہے جب جموں خطے کے پہاڑی اور دور دراز علاقوں میں جے کے پولیس اور سکیورٹی فورسز کی جانب سے ملی ٹینٹوں ، بشمول غیر ملکی ملی ٹینٹوں کے خلاف سخت کارروائیاں جاری ہیں۔
ذرائع کے مطابق اجلاس میں لائن آف کنٹرول (ایل او سی) اور بین الاقوامی سرحد (آئی بی) پر صفر دراندازی کو یقینی بنانے، دشوار گزار علاقوں میں چھپے ملی ٹینٹوں کے خاتمے کے لیے مربوط حکمتِ عملی اور دیگر سکیورٹی امور پر تفصیلی تبادلۂ خیال کیا جائے گا۔
لیفٹیننٹ گورنر منوج سنہا کے علاوہ چیف سیکریٹری اتل دولو، ہوم سیکریٹری چندرکیر بھارتی، ڈائریکٹر جنرل آف پولیس نلین پربھات اور انٹیلی جنس چیف نتیش کمار بھی اجلاس میں شریک ہوں گے۔ مرکزی ہوم سیکریٹری گووند موہن کے ساتھ تمام CAPFs اور خفیہ ایجنسیوں کے سربراہان بھی اجلاس میں موجود رہیں گے۔
گزشتہ چند ماہ کے دوران سکیورٹی فورسز نے کشتواڑ، ڈوڈہ، ادھم پور اور دیگر اضلاع کے بالائی علاقوں میں متعدد جھڑپوں کے دوران ملی ٹینٹوں کو نشانہ بنایا، جبکہ اس دوران ایل او سی اور آئی بی پر دراندازی کی کئی کوششیں ناکام بنائی گئیں۔
