امت نیوز ڈیسک//
سری نگر/جموں، 12 جنوری: جموں و کشمیر حکومت نے جموں و کشمیر بورڈ آف اسکول ایجوکیشن (جے کے بوس) کے چیئرپرسن اور جموں و کشمیر اسٹیٹ کونسل آف ایجوکیشنل ریسرچ اینڈ ٹریننگ (جے کے ایس سی ای آر ٹی) کے ڈائریکٹر کی تقرری کے لیے سرچ کمیٹی کی ازسرِنو تشکیل کر دی ہے۔
محکمہ عمومی انتظامیہ کی جانب سے جاری حکومتی حکم نامہ نمبر 45-جے کے (جی اے ڈی) 2026 کے مطابق، ازسرِنو تشکیل دی گئی کمیٹی کی سربراہی ایڈمنسٹریٹو سیکریٹری، پلاننگ، ڈیولپمنٹ اینڈ مانیٹرنگ ڈیپارٹمنٹ کریں گے۔ کمیٹی میں محکمہ زراعت پیداوار، محکمہ عمومی انتظامیہ، محکمہ اعلیٰ تعلیم اور محکمہ اسکولی تعلیم کے ایڈمنسٹریٹو سیکریٹریز بطور اراکین شامل ہوں گے۔
اس کے علاوہ یونیورسٹی آف جموں اور یونیورسٹی آف کشمیر کے وائس چانسلرز کو بھی کمیٹی کا رکن نامزد کیا گیا ہے۔ حکم نامے میں کہا گیا ہے کہ یہ ازسرِنو تشکیل جنوری 2025 میں جاری سابقہ حکومتی حکم نامے کو منسوخ کرتے ہوئے عمل میں لائی گئی ہے۔ کمیٹی کی سیکریٹریٹ خدمات محکمہ اسکولی تعلیم انجام دے گا اور اسے مقررہ مدت کے اندر اپنی سفارشات پیش کرنے کی ہدایت دی گئی ہے۔
