امت نیوز ڈیسک//
جموں (عامر تانترے) : جموں و کشمیر کے وزیر اعلیٰ عمر عبداللہ نے جمعہ کو یوٹی حکومت میں اپنا دوسرا بجٹ پیش کرتے ہوئے عوامی فلاح و بہبود سے متعلق کئی اعلانات کیے۔ طویل انتظار کے بعد بالآخر جمعہ کی دوپہر بجٹ کا پنڈورا باکس کھلا، جس میں کسانوں، طلبہ، خواتین، معذور افراد اور کمزور طبقات کے لیے متعدد راحتی اقدامات کا اعلان کیا گیا۔
بجٹ کا سب سے بڑا اعلان 6594.93 کروڑ روپے کے کراپ انشورنس اسکیم ہے، جس کے تحت کشمیر میں سیب کی بیشتر اقسام اور زعفران، جبکہ جموں خطے میں آم، لیچی اور زعفران کو بیمہ تحفظ فراہم کیا جائے گا۔ موسم کی مار اور شاہراہوں کی بندشوں کی وجہ سے جوجھ رہی کشمیر کی ہارٹیکلچر انڈسٹری سے وابستہ افراد کی کراپ انشورنس کی دیرینہ مانگ پر بالآخر حکومت نے بروقت فیصلہ لیا۔
غریب ترین کنبوں کو مفت سلینڈر
وزیر اعلیٰ نے غریب ترین کنبوں، یعنی تمام اے اے وائی (انتودیہ) خاندانوں کے لیے سالانہ چھ مفت ایل پی جی گیس سلنڈرز فراہم کرنے کا بھی اعلان کیا۔
تقریباً ایک گھنٹہ 47 منٹ طویل بجٹ تقریر میں وزیر اعلیٰ نے ماضی کے اقدامات کا بھی جائزہ لینے کے ساتھ ساتھ آئندہ مالی برس کے دوران حکومتی ترجیحات اور نئی تجاویز پیش کیں، جن پر بحث کے بعد قانون ساز اسمبلی کی منظوری درکار ہوگی۔
خواتین کا بسوں میں مفت سفر
عمر عبداللہ نے سرکاری بسوں میں خواتین کے لیے مفت سفر کی سہولت جاری رکھنے اور معذور افراد کے لیے بھی مفت سفر کی سہولت فراہم کرنے کا اعلان کیا۔ اس کے علاوہ اے اے وائی کنبوں سے تعلق رکھنے والے طلبہ کے لیے سیکنڈری تعلیم تمام اخراجات معاف کرنے اور سرکاری کالجوں میں زیر تعلیم ایسے طلبہ کی مکمل فیس معاف کرنے کا بھی اعلان کیا گیا، جنہیں کوئی اسکالرشپ حاصل نہیں ہو رہی۔
یتیم بچوں کے لیے ایک اہم اعلان کے تحت حکومت نے دونوں والدین سے محروم 6000 بچوں کو ماہانہ 4000 روپے وظیفہ براہ راست بینک کھاتوں میں فراہم کیا جائے گا، تاکہ ’’ان یتیم بچوں کی تعلیم، صحت اور غذائی ضروریات پوری ہو سکیں۔‘‘
