امت نیوز ڈیسک //
گاندربل، 24 فروری: جموں و کشمیر کے وزیر اعلیٰ عمر عبداللہ نے آج ضلع گاندربل کا دورہ کیا جہاں انہوں نے مجموعی طور پر 84.41 کروڑ روپے کی لاگت سے متعدد ترقیاتی منصوبوں کا سنگِ بنیاد رکھا اور بعض کا افتتاح بھی کیا۔میڈیا سے گفتگو کرتے ہوئے وزیر اعلیٰ نے کہا کہ ان منصوبوں کا مقصد علاقے میں بنیادی ڈھانچے کو مضبوط بنانا اور عوام کو بہتر سہولیات فراہم کرنا ہے۔ انہوں نے اس عزم کا اعادہ کیا کہ حکومت گاندربل سمیت تمام حلقوں میں ترقیاتی کاموں کو تیز رفتاری سے آگے بڑھائے گی۔
سی ٹی یونیورسٹی معاملہ پنجاب کے وزیر اعلیٰ سے اٹھائیں گے
پنجاب کی سی ٹی یونیورسٹی میں زیر تعلیم جموں و کشمیر کے طلبہ کے ساتھ مبینہ ہراسانی، خصوصاً رمضان کے دوران سحری و افطار کی سہولیات فراہم نہ کیے جانے کے حوالے سے پوچھے گئے سوال پر عمر عبداللہ نے کہا کہ وہ اس معاملے کو پنجاب کے وزیر اعلیٰ بھگونت مان کے ساتھ اٹھائیں گے۔ انہوں نے کہا کہ پنجاب حکومت نے ہمیشہ جموں و کشمیر کے لوگوں کا تعاون کیا ہے اور امید ظاہر کی کہ مسئلہ خوش اسلوبی سے حل ہوگا۔
ایران سے متعلق حکومتی ہدایات پر عمل کی اپیل
ایران میں موجود بھارتی طلبہ کے لیے حکومتِ ہند کی ایڈوائزری کے بارے میں وزیر اعلیٰ نے طلبہ پر زور دیا کہ وہ سرکاری ہدایات پر سختی سے عمل کریں۔ انہوں نے کہا کہ حکومتی مشوروں کو نظر انداز نہ کیا جائے تاکہ طلبہ اور ان کے اہل خانہ کو کسی قسم کی پریشانی کا سامنا نہ کرنا پڑے۔
