امت نیوز ڈیسک //
سرینگر، 5 جون: جموں و کشمیر کے سابق وزیر اعلیٰ اور نیشنل کانفرنس کے صدر فاروق عبداللہ نے کہا ہے کہ آرٹیکل 370 کا مستقبل کشمیر کے عوام اور اس کے وجود سے وابستہ ہے، اور وہ اس کے لیے اپنی سیاسی جدوجہد آخری دم تک جاری رکھیں گے۔
سرینگر میں میڈیا سے گفتگو کرتے ہوئے فاروق عبداللہ نے کہا، ’’جس دن ہم دفن ہو جائیں گے، اسی دن کشمیر بھی دفن ہو جائے گا اور آرٹیکل 370 بھی دفن ہو جائے گا۔‘‘
ان کے یہ بیانات ایسے وقت میں سامنے آئے ہیں جب نیشنل کانفرنس نے اعلان کیا ہے کہ وہ پارلیمنٹ کے آئندہ مانسون اجلاس کے پہلے دن نئی دہلی میں احتجاج کرے گی۔ پارٹی جموں و کشمیر کو ریاستی درجہ واپس دینے اور آئینی ضمانتوں کی بحالی کا مطالبہ کر رہی ہے۔
8 جون کو مجوزہ انڈیا اتحاد کی میٹنگ کے حوالے سے فاروق عبداللہ نے کہا کہ نیشنل کانفرنس اس اجلاس میں شریک ہوگی۔
انہوں نے کہا، ’’میں یا عمر عبداللہ ، ہم میں سے کوئی ایک اجلاس میں شرکت کرے گا۔ ظاہر ہے ہم اس اتحاد کا حصہ ہیں اور وہاں موجود رہیں گے۔‘‘
