پونچھ اور راجوری میں سیکورٹی ہائی الرٹ

راجوری: جموں و کشمیر پولیس کا کہنا ہے کہ تشدد کے حالیہ واقعات کے پیش نظر سرحدی اضلاع راجوری اور پونچھ میں ہائی سکیورٹی الرٹ جاری کیا گیا ہے۔ پونچھ اور راجوری رینج کے ڈپٹی انسپکٹر جنرل (ڈی آئی جی) ڈاکٹر حسیب مغل نے ایک پریس کانفرنس سے خطاب کرتے ہوئے کہا کہ ’’علاقے میں عسکریت پسندوں کے دو سے تین منقسم گروپ موجود ہیں اور ان کی نقل و حرکت پر نظر رکھی جارہی ہے۔‘‘

مغل نے کہا کہ ’’وہ (عسکریت پسندوں کے گروپ) جلد ہی مارے جائیں گے۔‘‘ راجوری کے درہال میں 11 اگست کو ہونے والی حالیہ کارروائی کے بارے میں جہاں پرگل گاؤں میں ایک فوجی کیمپ پر فدائین حملہ کیا گیا تھا۔ ڈی آئی جی نے کہا کہ ’’سکیورٹی ایجنسیز پہلے سے ہی ان کی نقل و حرکت پر نظر رکھ رہی تھیں۔ اسی درمیان کندھرا، بدھل میں انکاؤنٹر شروع ہوا۔ 14 اگست کو انتہائی خراب موسم کے درمیان عسکریت پسند فرار ہونے میں کامیاب ہو گئے۔‘‘

انہوں نے کہا کہ ’’اس سارے منظر نامے کو مدنظر رکھتے ہوئے، راجوری اور پونچھ علاقوں میں سیکورٹی کو ’ہائی الرٹ‘ پر رکھا گیا ہے، جب کہ محاصرہ اور تلاشی تقریباً یومیہ بنیاد پر جاری ہے۔‘‘ انہوں نے مزید کہا کہ ’’اہم تنصیبات کی سکیورٹی مزید سخت کر دی گئی ہے۔‘‘ انہوں نے عوام ’’کسی بھی مشتبہ نقل و حرکت کی اطلاع فوری طور فورسز کے ساتھ بروقت کارروائی کے لیے شیئر‘‘ کرنے کی بھی اپیل کی