سری نگر:جموں وکشمیر کی انفرادیت، اجتماعیت اور وحدت قائم و دائم رکھنا نیشنل کانفرنس کا بنیادی منشور رہا ہے اور پارٹی اپنے ان اصولوں پر آج بھی ڈٹی ہوئی ہے یہی وجہ ہے کہ ہماری جماعت کیخلاف چاروں طرف سے سازشوں کے جال بْنے جارہے ہیں۔
ان باتوں کا اظہار نیشنل کانفرنس کے معاون جنرل سکریٹری ڈاکٹر شیخ مصطفےٰ کمال نے آج شیر کشمیر بھون جموں میں پارٹی عہدیداروں اور کارکنوں سے خطاب کرتے ہوئے کیا۔
کمال نے کہا کہ نیشنل کانفرنس کیخلاف روز اول سے ہی سازشیں رچائیں جارہی ہیں لیکن جموں وکشمیر کے عوام کی اس ہردلعزیز جماعت کوزیر کرنے کا ہر ایک حربہ ناکام ہوا ہے کیونکہ اس جماعت کو حقیقی معنوں میں تینوں خطوں کے عوام کی بے لوث حمایت حاصل ہے۔
ڈاکٹر کمال نے کہا کہ جموں و کشمیر اس وقت ایک نازک دور سے گزر رہا ہے اور وقت کا تقاضا ہے کہ سب لوگ متحد ہوکر اپنے حقوق کی بحالی کیلئے لڑیں اور اس کیلئے نیشنل کانفرنس کی مضبوطی انتہائی لازمی ہے۔
اْن کا کہنا تھا کہ نئی دلی نے گذشتہ 4سال سے یہاں افسر شاہی کا نظام مسلط کر رکھا ہے جو عوام کیلئے وبال جان ثابت ہوگیاہے۔ لوگوں کے مسائل و مشکلات حل نہیں ہو پارہے ہیں۔
ایک ایسی ریاست،جہاں لوگ اقتصادی بدحالی کے شکار ہوں اور بے روزگاری عروج پر ہو،کے حکمرانوں کی توجہ عوام کو اسبھنور سے نکالنے کیلئے خصوصی منصوبوں پر ہونی چاہئے لیکن یہاں صرف تشہیر بازی اور لیپاپوتی پر مبنی اقدامات کئے جارہے ہیں۔
انہوں نے کہا کہ حکومتی طرز عمل سے زمینی سطح پر عوام زبردست مصائب و مشکلات سے دوچار ہوگئے ہیں، لوگوں کا نظام پر سے مکمل طور پر بھروسہ اْٹھ گیا ہے اور انہیں دور دور تک روشنی کی کرن نظر نہیں آرہی ہے۔
کمال نے پارٹی عہدیداروں اور کارکنوں پر زور دیا ہے کہ موجودہ دور میں ہم پر زیادہ ذمہ داری عائد ہوتی ہے کہ ہم لوگوں کے مسائل و مشکلات ہر سطح پر اْجاگر کریں اور ان کا سدباب کرانے کیلئے ہر ممکن کوشش کریں۔
