امت نیوز ڈیسک //
کپواڑہ:حفاظتی اہلکاروں کا کہنا ہے کہ ضلع کپواڑہ کے چیرکوٹ علاقے کے رہائشی بلال احمد ڈار کی عسکریت پسندوں کے ساتھ روابط کے سلسلے میں متعدد ذرائع سے موصول ہوئی خفیہ جانکاری کے بعد کپواڑہ پولیس، فوج کی 21 اور 47 راشٹریہ رائفلز کی مشترکہ ٹیم نے اسے حراست میں لے لیا۔
اہلکاروں نے بتایا کہ بلال نے پوچھ تاچھ کے دوران شمالی کشمیر کے مختلف علاقوں میں سرگرم ’’اصلاحی فلاحی ریلیف ٹرسٹ‘‘ نام کے ایک این جی او کے ساتھ وابستہ کئی افراد کے نام ظاہر کیے جو غریبوں اور مسکینوں کی مدد کی آڑ میں ٹیرر فنڈنگ ریکٹ چلا رہے تھے۔پوچھ تاچھ کے دوران بلال احمد کی نشاندہی پر لنگیٹ کے وحید احمد بٹ، سنگھرپورہ بارہملہ کے جاوید احمد نجار اور سوپور کے مشتاق احمد نجار، بشیر احمد میر اور زبیر احمد ڈار کو بھی حراست میں لے لیا گیا۔ حفاظتی اہلکاروں کے مطابق ٹیرر ماڈیول پاکستانی ہینلڈرز کے روابط میں تھے اور ’’تحریک المجاہدین جموں و کشمیر‘‘ نام کے گروپ کے آپریشنز میں معاونت فراہم کر رہے تھے۔ حفاظتی اہلکارون نے ان افراد کی تحویل سے اسلحہ اور گولہ بارود بھی برآمد کرنے کا دعویٰ کیا ہے جس میں آئی ای ڈی بنانے کے لیے بنیادی مواد، پانچ پستول، دس میگزین، 49 پستول ایمونیشن دو گرینیڈ اور ایک آئی ای ڈی شامل ہے۔
