امت نیوز ڈیسک //
سرینگر:جموں کشمیر کے سابق وزیر اعلٰی اور پی ڈی پی صدر محبوبہ مفتی کی نئی رہائش گاہ واقع کھمبر نشاط میں تعینات سکیورٹی فورسز اہلکاروں کے لئے بنیادی سہولیات کا فقدان ہے۔سکیورٹی اہلکاروں کو رہنے کے لئے معقول کمرے، بجلی اور پانی کی عدم دستیابی ہے جس کی وجہ سے ان کو سرما کی ٹھٹھرتی سردی میں شدید مشکلات کا سامنا کرنا پڑتا ہے۔
اس ضمن میں محبوبہ مفتی کی دختر التجا مفتی نے ایڈیشنل ڈائریکٹر جنرل آف پولیس سکیورٹی ایس ڈی جموال کو ان مشکلات کے بارے میں خط لکھ کر مطلع کیا۔
التجا مفتی نے مذکورہ اعلی افسر کو خط میں لکھا ہے کہ کھمبر رہائش گاہ میں سکیورٹی اہلکاروں کو رہنے کے لئے کمرے نہیں ہے، نہ ہی ان کو بجلی سپلائی ہے اور نہ ہی ان کو ہاتھ منھ دھونے کے لئے پانی یا باتھ روم دستیاب ہے۔
انہوں نے کہا کہ ان بنیادی سہولیات کی فقدان کے متعلق انہوں نے سی آر پی ایف اور پولیس افسران کو مطلع کیا گیا، تاہم ابھی تک اس پر کوئی کارروائی نہیں کی گئی ہے۔انہوں نے کہا کہ فی الوقت یہ اہلکار ان کے گراج اور ایک ٹنٹ میں رہ رہے ہیں جہاں ان کو ٹھٹھرتی سردی سے مقابلہ کرنا پڑ رہا ہے۔التجا مفتی نے سکیورٹی افسر سے جلد از جلد پری فیبریکیٹ رہائش گاہ تعمیرکرنے کی اپیل کی۔
واضع رہے کہ محبوبہ مفتی کو گزشتہ ہفتے سرینگر کی سرکاری رہائش گاہ سے سرکار نے خالی کرنے کا حکم دیا جس کے بعد وہ کھمبر علاقے میں منتقل ہوئی۔بتایا جاتا ہے کہ یہ علاقہ سنسان مقام پر واقع ہے اور یہاں سکیورٹی کے خطرات بھی لاحق ہے۔
