(کولگام) جنوبی کشمیر کے کولگام ضلع کے کھر بٹ پورہ علاقے میں کل شام ایک سڑک حادثے میں ایک شخص کی موت ہو گئی جبکہ 2 دیگر زخمی ہو گئے، یہ بات حکام نے اتوار کو بتائی۔ ایک اہلکار نے خبر رساں ایجنسی کو بتایا کہ حادثہ سنیچر کی شام اس وقت پیش آیا جب کھر بٹ پورہ میں ایک تیز رفتار گاڑی نے ایک موٹر سائیکل کو ٹکر مار دی جس کے نتیجے میں 3 افراد زخمی ہو گئے۔ انہوں نے بتایا کہ تمام زخمیوں کو ضلع اسپتال کولگام منتقل کیا گیا جہاں سے دو کو ایس کے آئی ایم ایس سورا ریفر کیا گیا۔ بعد میں ان میں سے ایک زخموں کی تاب نہ لاتے ہوئے چل بسا۔ جاں بحق ہونے والوں کی شناخت محمد رفیق ملک ولد عبدالرشید ملک کے نام سے ہوئی ہے جب کہ زخمیوں کی شناخت بشیر احمد ولد عبدالغنی اور مشتاق احمد ملک ولد غلام قادر ملک کے نام سے ہوئی ہے جو کہ سب کھر بٹ پورہ کے رہائشی ہیں۔ دریں اثناء پولیس نے واقعہ کا نوٹس لے لیا ہے۔
